Gertakariak pilatzen ari dira gaur, berriro ere, Renfe enpresako C-3 lineako tren zerbitzuan. Izan ere, Kirk izeneko urakana bortizki agertu da Aiaraldean eta kalteak sortu ditu garraio publikoaren azpiegituran. Hain zuzen, EAEn erregistratu den haize bolada indartsuena izan da Urduñakoa, 190 kilometro ordukoa.
Egoera horretan gertatu dira ezbeharrak. Renfeko langileek adierazi diote Aiaraldea Komunikabideari adar batek arazoak eragin dituela azpiegituran, Ollarganen, goizeko lehen ordutan. Horrez gain, Laudio eta Amurrio arteko ibilbidean trenbide bakarra egon da funtzionamenduan goizeko lehen orduetan. Ondorioz, atzerapenak egun osoan luzatu daitezkeela aipatu dute Renfeko langileek.
Eguerdian zuhaitz bat erori da Ugaon trenbidearen gainean eta ordu erdiko atzerapenak sortzen ari da.
Gertakari gehiago jazo dira eskualdean. Adibidez, Gardean zuhaitz bat bota du haizeak errepidean, eta gauza bera gertatu da Izoria eta Amurrio artean. Araban eskola kirola bertan behera uztea erabaki dute.
Antza, urakanaren haize ufada indartsuenak igaro dira jadanik, baina larrialdi zerbitzuek alerta laranja mantendu dute. Hori dela medio, gomendioak dira mendira ez joatea, errepidean toki landaretsuak ekiditea (adarrak edo bestelako elementuak gainean ez erortzeko) eta bidaiak ahalik eta gehien saihestea. Oinezkoei horma, eraikin eta publizitate hesietatik urruntzea ere aholkatu diete.
🟠 Haizeagatik ezarritako #AlertaLaranja-ren inguruko gomendioak 👇🏻
— SOS Deiak - 112 (@112_SOSDeiak) October 9, 2024
🛣️ Ahal dela ez bidaiatu errepidez, eta, batez ere, saihestu basoak edo landaretza handiko eremuak.
⛰️ Egun horretan ez joan mendira.
🌳Urrundu erlaitzetatik, hormetatik, zuhaitzetatik edo… pic.twitter.com/skoXe9yqnJ