Eztabaida luzearen ostean, Aiaraldeko Udako Argazki Lehiaketak badauzka irabazleak: Itziar Montalban eta Aritz Galarza, hain zuzen. Izan ere, bozketa fasea amaitu ondoren, kategoria bakoitzeko babes gehien jaso zuten hamar irudiak izan zituzten aztergai Maied Urrutia argazkigintza irakasleak eta Janire Usategi Jare estudioko buruak.
Hasiera batean, bakoitzak lan ezberdinak hautatu zituen, "kalitate handia dagoelako lehiaketan". Gero, iritziak adosteko, biak batu ziren eta irizpideak bateratzera aldera lehenetsi zuten, adibidez, konposizioa. Horri eutsita, Aiaraldea kategorian Urtegia saritu dute, konposizioa ondo eginda dagoelako eta eskualdeko ikurra delako Gorobel mendilerroa. "Egia da irudi oso ikusia dela, baina ez diogu aitortza kenduko horregatik, asko heldu zaigu eta", azaldu dute.
Mundua kategorian, aldiz, Goiztiarra izan da lan hautatua. Epaimahaikideek baloratu dute poetikoena dela eta sentimendu udatiarra piztu diela. Horrez gain, konposizioa eta argia egokitzat jo dituzte.
Urtegia argazkiaren egilea Itziar Montalban da eta Guzurtegi jatetxean 90 eurotan zenbatetsitako otordua irabazi du. Beste sariduna Aritz Galarza da eta 8 pertsonentzako esperientzia izango du Mendexa Park-en. Horrez gain, Aiaraldeko bazkideen esparruan, Argiñe Rodriguez izan da sariduna, Itxina lanarekin.
Aiaraldea Komunikabidea bera jarriko da harremanetan aste honetan bertan irabazleekin sarien kudeaketari ekiteko.