Kalean dago honezkero Aiaraldea Hemen hamabostekariaren azken zenbakia, 207. alegia. Orotariko gaiak bildu ditugu agerkariko 32 orrietan.
Ainhoa Jungitu gazte urduñarrarentzako da hamabostekariko azala. Duela urtebete esklerosi anizkoitza diagnostikatu zioten Jungituri, eta orain proiektua garatu du beste bi lagunekin gaixotasunaren aurkako ikerketa ekonomikoki laguntzeko.
Boladan dagoen beste gai bati ere heldu diogu agerkarian: Valentziako uholdeak. Iaz izan zen 1983ko uholdeen 40. urteurrena, zarata handirik gabe, egia esanda. Valentzian pasa den astean gertatutakoak, ordea, jende ugariren oroitzapenak piztu ditu. Gainera, asko eta asko izan dira Mediterraneo aldera laguntza eskaintzera abiatu diren aiaraldearrak.
Ezkontzen bilakaera Aiaraldean
Ezkontzen sasoia bukatzear den honetan, hamabostekarian tartea eskaini diogu gai horri. 1970ko hamarkadatik hona %65 egin du behera ezkongaien kopuruak eskualdean. Ezkontza eta famili eredu desberdinen testigantzak bildu ditugu hamabostekariko orrietan.
Hauek eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da argitalpena eskualdeko saltoki, taberna, ikastetxe, kulturgune, liburutegi eta kaleetan, doan.