Zergatik erabaki zenuten topaketa hauek antolatzea?
Egitea erabaki genuen ikusten genuelako gure eskualdean badagoela jende nahikotxo trikitia eta panderoa jotzen, baina ez dira kalera ateratzen. Gure asmoa da lagun horiek guztiak animatzea elkarrekin kalera ateratzera eta jotzera.
Nola baloratzen duzue orain arteko ibilbidea?
Orain arteko balorazioa ez da txarra, baina ez nuke esango oso ona izan denik. Izan ere, badakigu eskualdean badaudela irakasle dezente eta ez dira animatzen ez eurak ez euren ikasleak parte hartzen topaketan, baina ezin dugu askoz gehiago egin. Guztiak gonbidatzen ditugu, baina eurek dute azken hitza.
Zuen helburuetako bat da euskal kulturaren arlo hau indartzea. Zein da bere egoera gaur egun Aiaraldean, zuen ustez?
Gure helburua da trikitiaren eta panderoaren mundua indartzea eskualdean. Badago jendea eta atera behar da kalera, gure ustez.
Batzuentzat trikitia bizimodu bilakatu da nolabait. Nolakoa da bide hori hartzen duen trikitilari baten bizitza?
Nik hitz egin dezaket nire izenean. Egia esanda, nik trikia ez banu joko, sumatuko nuke zerbait faltako litzaidakeela bizitzan. Urte pilo daramatzat trikia eta, bereziki, panderoa jotzen; eta asko mugitzen naiz mundu honetan.
Nahiz eta ez jo edo bazkarian ez egon, jendea topaketan parte hartu dezake, ez? Noiz proposatuko zenioke jendeari agertzea bihar?
Nahiz eta ez etorri bazkaltzera, edozein unetan etor daitezke, bai jotzera zein egotera. Adibidez, 11:30ean kalejira dugu herriko plazatik eta etor daitezke triki poteora. Bestalde, bazkariko tiketik ez duena bertaratu daiteke Gaztetxera 16:00etan, adibidez. Gurekin gozatzeko aukera izango dute eta ongi etorriak izango dira. Azkenik, eskerrak eman nahi dizkiogu Amurrioko Gaztetxeari ekitaldia hartzeagatik.