5.646 sinadura bildu dituzte guztira “Aiaraldean osasun sistema publiko eta duina eskatzeko”. Hala adierazi dute SOS Aiaraldeako kideek prentsara bidalitako ohar baten bidez. Nabarmendu dutenez, “fisikoki” jaso dituzte atxikimendu guztiak, “dozenaka boluntariok eskualdeko osasun zentro, lantegi, hezkuntza zentro, merkatu zein kaleetan jarritako postuen bidez”.
Hori kontuan hartuta, pozik azaldu dira ekimenak izandako harrerarekin, “oso ona” izan dela nabarmenduta.
Izan ere, zehaztu dutenez, eskualdeko biztanleria osoaren %13,2ak eman du sinadura, “eta ehuneko hori handiagoa da, sinadurak adinez nagusiko pertsonek eman dituztela kontuan hartuta”.
- Iragan urriaren 7an aurkeztu zuten sinadurak biltzeko kanpaina, Urduñako Kontsultategian eginiko agerraldian. Bertan, lau aldarri zehatz plazaratu zituzten:
- Laudio eta Amurrioko Etengabeko Arreta Guneetako ordutegi eta txanda guztietan bermatzea beharrezkoak diren espezialitate eta kategoria guztietako osasun profesionala, baita medikuak ere. Era berean, eskualdean dauden Osakidetzako gainerako azpiegituretan ere behar diren giza baliabide guztiak uneoro bermatzea.
- Laudioko anbulantzia medikalizatuko (SVA) txanda guztietan beharrezkoak diren osasun profesional guztiak bermatzea, medikuak barne.
- Osakidetzaren oinarrizko asistentzia-zerbitzuak ziurtatzea.
Eskatzen dute, halaber, Buru Osasunerako Zentroko arreta arina izatea, psikiatra zein psikologoagatik artatuak izateko itxaron zerrendak murriztuz. Buru osasun arazoak dituzten pertsonek eskubidea dute kalitatezko arreta jasotzeko.
Sinaduren entrega, datorren astean
Aurreratu dutenez, abenduaren 12an entregatuko dituzte sinadura guztiak. Gasteizera joko dute horretarako, Osakidetzaren zerbitzu zentraletara. 12:00etan jarri dute zita bertan, eta nahi duen orori luzatu diote bertaratzeko gonbita.
