Azken urtean ohikoa bilakatu den egoera amaitzear dago Renfeko C-3 zerbitzuko trenetan. Izan ere, azken hilabeteetan inoiz baino grafiti gehiago ikusi dira garraio publiko horren unitateetan, baina jadanik hasi dira kentzen.
Hain zuzen, Ollargango Renfe eta ADIFeko tailerretan ekin diote lanari. Lehen garbiketa lan horiek ez ziren han egiten, baizik eta Abandon bertan, baina eremu horretan istripuak gertatu ziren zerbitzuan ez dauden trenak uzten dituzten trenbideetan. Ondorioz, unitateteek kolpeak hartu zituzten. Hasiera batean, grafitiak kentzeko erabiltzen diren produktu likidoei egotzi zieten ezbehar horien ardura.
Gerora, ondorioztatu dute trenetan baliatzen den olio berria izan daitekeela istripuen benetako eragilea, baina, bada ez bada, ez dituzte garbiketa lanak berrezarri atzo arte.
Garbiketa lanen toki aldaketarako arrazoi gehiago ere egon dira, 2030 Agenda, besteak beste. Izan ere, ez dago bermerik Abandoko tren geltokian sortzen diren hondakin kimiko guztiak (margoa zein disolbatzaileak) itsasadarrean bukatu ez dezaten, eta arrazoi horregatik ere eten zituzten lan horiek.