Espektro autistaren nahasmendua duten airaldearrek orain arte zituzten hainbat zerbitzu izateari utzi diote. Hala salatu dute hainbat familiek hedabideei helarazitako ohar baten bidez. Azaldu dutenez, APNABI elkarte bizkaitarrak eskaintzen zizkien zerbitzu horiek orain arte, baina egiteari utzi egin dio, Bizkaiko Foru Aldundiak uko egin diolako probintziatik kanpoko familiei ematen zaien arreta finantzatzeari.
Senideek kontatu dute elkarteko kideekin bildu direla, eta urte guzti hauetan egin duten lan guztia eta izandako prestutasuna eskertu diete. Hala azaldu dute oharrean: “Jakinarazi ziguten Bizkaiko Foru Aldundiak finantzaketa irizpideak aldatu zituela eta, horren ondorioz, Aiaraldeko Espektro Autistaren Nahasmendua zuten familiek elkarte horrek ordura arte eskaintzen zuen zerbitzuen katalogotik kanpo geratzen ginela”.
Kaltetutako familiek nabarmendu dute ez dagoela zerbitzu horiek eskaintzen dituen beste elkarte edo erakunderik eskualdean, eta ez dirudiela egongo denik “epe labur edo ertainean”.
Familiek bilera irekia egingo dute Amurrion abenduaren 18an, alternatiba posibleak aztertzeko
Hori dela eta, bilera ireki bat egingo dute datorren abenduaren 18an, 19:00etan Amurrioko Kultura etxean, eta bertaratzeko deia luzatu diete Espektro Autistaren Nahasmendua duten Aiaraldeko pertsona guztien familiei, eskualdean egon daitezkeen “aukera edo alternatibak” proposatu eta eztabaidatzeko. Modu horretan, espazio bat sortu nahi dute nahasmendu hori duten pertsonak “euren bizitza ziklo osoa” garatu ahal izan dezaten, hezkuntzaren, aukera berdintasunaren, aisialdiaren, osasunaren edota lanaren esparruetan, besteak beste.
Bileran parte hartzeko interesa dutenei eskatu diete aurretik mezu bat bidaltzea autismoaiara@gmail.com helbidera, “bilera hobeto antolatzeko helburuarekin”.
APNABIren adierazpenak
Aiaraldea Komunikabidea APNABIrekin jarri da harremanetan. Elkarteko kideek adierazi dute lanean ari direla “Aiaraldeko pertsonek eta familiek haien bizitza osoan kalitatezko laguntzak jasotzen jarrai dezaten”.