MUGARRIAK 2024

Belaunaldi berria kirolari profesionalen olinpoan

Aimar Gutierrez Bidarte 2025ko urt. 18a, 11:00

Odol berria dago goi-mailako kirolarien artean, horren adibide dira Arkaitz Eskuza eta Iker Larrazabal pilotariak. / Aiaraldea.eus

Kirolari gazteen belaunaldia aurrekoa ordezkatzeko iritsi da. Tartean badira Aiaraldeko izen propioak, geroz eta gehiago nonahi entzungo ditugun izenak.

Begibistakoa da; iritsi da kirolari profesionalen belaunaldi berria. Gazteak euren lekua aldarrikatzen dabiltza, eta zaharragoek hauei bide ematea besterik ez dute. Kirol eta maila guztietan da agerikoa: kadete mailan, gazte mailan eta baita maila gorenetan ere. Futbolean, txirrindularitzan, tenisean, pilotan… Geroz eta gehiago dira XXI. mendean jaiotako izarrak, eta Aiaraldean ere badago dir-dir egiten duenik ere.

Larrazabal eta Eskuza

Honezkero, inor gutxi harrituko da Iker Larrazabalen edota Arkaitz Eskuzaren izenak irrati eta telebista esatarien ahotan entzuterakoan. Are gehiago, Larrazabalek Mariezkurrenarekin batera Binakako Txapelketan jokatuz itxi du urtea, Iñaki Artolaren lesioa tarteko. Goi mailako partidak pilatuz doa Olabezarrekoa.

2002 eta 2024an jaioak dira Larrazabal eta Eskuza, eta, apurka apurka, euren txokoa egiten doaz pilota profesionalean. Eskuzak 2023ko urtarrilean debutatu zuen Eibarko Astelena pilotalekuan, Aspe enpresarekin. Denbora gutxian lan txukuna egin du atzelari laudioarrak. Aipatzekoa aurtengo Binakako Serie B Txapelketan egindako jarduna, aise iritzi baitzen finalaurreko ligaxkara. Iker Larrazabal izan zuen aurrez aurre bertan, profesional mailan bi aiaraldearrek elkarren aurka jokatzen zuten lehen partidan. Larrazabal-Eskiroz bikotea gailendu zen norgehiagoka hartan, 22-11 Eskuza eta Egiguren V.aren kaltean. Larrazabalen eskarmentuak jarri zuen aldea partidan nonbait. 2020tik dabil aiararra profesional mailan Baiko enpresarekin jokatzen. Lau final jokatu ditu eta bi txapela janztea lortu du; azkenengoa aurten bertan. Biek ala biek ibilbide luzea dute aurretik oraindik, eta behin baino gehiagotan aritu beharko dira elkarren aurka kantxan.

Txirrindulari gazteak loria bila

Txirrindularitza profesionalak ere baditu aiaraldear gazteak puntako kirolarien artean. Horietako bat da Ander Ganzabal. Orozkoarrak denboraldi bikaina egin du Euskadi Fundazioko 23 urte azpiko taldean, eta egindako lan finaren fruituak jasotzen dabil orain. Izan ere, bi urterako sinatu berri du kontratua Euskaltel Taldean, eta munduko onenekin neurtzeko aukera izan du dagoeneko. Triatloian lehiatuz ekin zion kirol ibilbideari Ganzabalek, eta txirrindularitzara jauzia “berandu” egin bazuen ere, lortu du lekua egitea tropel profesionalean. “Zorionekoa” dela aitortu zion Aiaraldea Komunikabideari, baina maila oso altua erakutsi du azken urteetan, egindako sakrifizioaren erakusgarri. World Tourrean arituko da 2025ean, eta hainbatetan izango ditu aldamenean Pogačar eta Remco bezalako izen handiak.

Baliteke ere, aurki, Hodei Muñoz txirrindulari aiararrarekin topo egitea tropel profesionalean. Ganzabalek bezala, Muñozek denboraldi bikaina egin du, eta 2025etik aurrera, bi urterako konpromisoa hartu du Devo Teamekin, Soudal Quick-Step taldeko filial amateurrarekin.

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide