Jarraipen zabala izan du hezkuntza publikoko sindikatuek deituriko lehen greba egunak Aiaraldean

Aimar Gutierrez Bidarte 2025ko urt. 22a, 12:30
Deskargatu Info Ahotsak :

Bilbon egin dute mobilizazio nagusia hezkuntza publikoko sindikatuek. / LAB Sindikatua

LAB, Steilas, ELA eta CCOO sindikatuek deituta, grebara jo dute gaur EAEko hezkuntza publikoko irakasleek. Aiaraldean irakasleen %50ak baino gehiagok egin du bat deialdiarekin, ikastetxez ikastetxe jarraipena desberdina izan bada ere.

Lehen greba eguna dute gaur Araba, Bizkaia eta Gipuzkoako hezkuntza publikoko langileek, LAB, Steilas, ELA eta CCOO sindikatuek dietuta. Gaurkoan irakasleak atera dira kalera, eta bihar ere lanuztea egingo dute.

Jarraipen zabala Aiaraldean

Greba deialdiak jarraipen zabala izan du Aiaraldeko hezkuntza publikoko irakasleen artean. Langileen ia %60ak egin du bat lanuztearekin, ikastetxez ikastetxe jaraipena desberdina izan den arren.

Eskualdeko zentro publiko handiek aise nozitu dute grebaren eragina; Laudio Institutuan %61ekoa izan da jarraipena eta Zaraobe Institutuan %50ekoa. Antzeko kopuruak zenbatu dituzte Amurrioko Mendiko Eskolan (%60) eta Zabaleko Ikastetxean (%66)

Artziniegako Arteko Gure Ama Herri Ikastetxean eta Orozkoko Eskolan zenbatu du Aiaraldea Komunikabideak jarraipen baxuena; %45 eta %41, hurrenez hurren. Bide beretik, Laudioko Latiorro Ikastetxean irakasleen %46 batu da mobilizaziora.

Kontrara, Urduñako Herri Ikastetxean eta Etxaurren Ikastolan irakasleen %72ak eta %87ak egin dute bat lanuztearekin. Okondoko Eskolan zerbitzu minimoek funtzionatu dute soilik.

Mobilizazio eta aldarrikapen nagusiak

Bilbon egin dute mobilizazio nagusia gaur eguerdian, sare publikoko langileen lan baldintzak hobetzea eta hekuntza publikoa erdigunean jartzea eskatu diote Hezkuntza Sailari.

Hamabi eguneko greba zikloari hasiera eman diote horrela sindikatuek. Gaur eta bihar bezala, otsailaren 26an eta 27an ere egingo dute greba irakasleek, baina ez dira grebara deituta dauden bakarrak.

Haurreskoletako langileek urtarrilaren 28an eta 29an eta otsailaren 12an eta 13an egingo dituzte lanuzteak; sukaldariek eta garbitzaileek, aldiz, urtarrilaren 30ean eta 31n eta otsailaren 19an eta 20an.

Zortzi aldarrikapen

LAB, Steilas, ELA eta CCOO sindikatu deitzaileek zortzi aldarrikapen zehatzetan bildu dituzte greba zikloaren arrazoiak:

  1. Lan zamak arintzea
  2. Gazteberritze plana ezartzea
  3. Hezkuntza publikoko langileek eros ahalmena berreskuratzea
  4. Enplegua egonkortzea eta bermatzea
  5. Azken urteetan Hezkuntza Sailak ezarritako murrizketak bertan behera uztea
  6. Ordezkoen lan baldintzak hobetzea
  7. Lana eta bizitza uztartzeko benetako neurriak ezartzea, zaintzaren ikuspegitik
  8. Lan-osasun, berdintasun eta euskara planak osatzea
Hezkuntza

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide