Aiaraldeko eta kanpoko artistentzako deialdiak argitaratu ditu Aiaraldea Kultur Faktoriak berriki. Horien helburua da euskarazko sormen lanak sustatzea eskualdean zein Euskal Herrian, oro har.
Bi beka mota proposatu dituzte. Alde batetik, Arte Arnasa dago. Deialdi horrek 1.000 euroko babes ekonomikoa eskaintzen du, baita bidelaguntza ere, proiektuaren hazkuntza eta garapena bultzatzeko.
Lau proiektuk eskuratu dezakete beka hori (norbanakoenak edo taldekakoak izan daitezke) eta 15 eta 99 urte bitarteko artistak daude deituta, betiere euskaraz egiten badute euren lana.
Oinarri guztiak eta proiektuak nola aurkeztu jakiteko, esteka honetan jaso daiteke informazio guztia. Izen-ematea, aldiz, inprimaki honetan bete beharra dago.
Faktoriak berak gomendio batzuk zabaldu ditu proiektua aurkezteko orduan aintzat hartzeko, hemen ikusi datezkeenak.
Deialdiaren azken irabazleak Martz, Malen Atxa eta Xabi Basterra, Goizane Rodriguez eta Garazi Egiguren izan dira.
Ver esta publicación en Instagram
Sormen egonaldiak
Bestalde, Murgildu Sormenean deialdia dago. Kasu horretan, Aiaraldea Kultur Faktoriak astebeteko egonaldia jartzen du sortzaileen eskura. Egunero otordu batekin hornitzeaz gain, Faktoria espazioa parez pare irekitzen zaie artistei, erabili dezaten: kamerinoa, oholtza, argiztapena, soinu-ekipoa, ekonomatua, sukaldea, dutxak, eskualdeko sortzaileekin hartu-emanak, naturguneetara irteerak...
Horrez gain, laguntzeko prestutasun osoa daukate Aiaraldea Kultur Faktoriako arduradunek edozein erraztasun emateko: eskualdeko intereseko herritarrekin harremanetan jartzeko, inguruak ezagutarazteko...
Lau sormen egonaldi dira guztira eta oinarriak hemen irakur daitezke. Izena emateko, ordea, hemen klikatu beharra dago.
Egitasmo horren eskutik Eneritz Furyak, Aitziber Duarte, Peru Galbete, Ainara Bento, Jare Prieto eta Eva Perez-Pons, Idoia Tapia, Maria Iturbe eta Maialen Ramirez eta Amaia Molinet aritu ziren iaz Faktorian.
Horrez gain, Arte Eman Festan ere parte hartu zuten, bai Faktorian bertan zein Gasteizen.
Ver esta publicación en Instagram