Greba zikloan murgilduta dago EAEko Hezkuntza Publikoa. Iragan asteazken eta ostegunean sukaldariek eta garbiketako langileek egin zituzten lanuzteak, LAB, ELA eta CCOO sindikatuek deituta. Aste honetan, aldiz, irakasleen txanda izango da, 26an eta 27an.
Sindikatuek positiboki baloratu dute ekimenak izandako harrera. Nabarmendu dutenez, sukaldari eta garbitzaileen %70 baino gehiago batu zen grebara. Ez dago Aiaraldeko datu zehatzik, baina jarraipena "oso zabala" izan da eskualdeko hezkuntza zentroetan ere, iturri sindikalek Aiaraldea Komunikabideari adierazi diotenez.
Lan baldintzak hobetzea da mobilizazio ziklo honen xedea. Sindikatuek gogorarazi dute urtarrilaren 30ean eta 31n ere egin zituztela lanuzteak, eta horren ostean negoziazio mahaiak deitu zituela Hezkuntza Sailak. Langileen ordezkarien aburuz, Jaurlaritza hasi da funtzioen edo kategorien egokitzapenaren inguruan hitz egiten, "grebek behartuta". Hala ere, "urrun" ikusten dute gobernua grebaren aldarrikapenei erantzuten dieten proposamenetatik, eta horregatik erabaki dute bigarren mobilizazio zikloa abiatzea otsailean.
"Lan baldintza prekarioenak"
Sukaldari eta garbitzaileek kasuan, "hitzarmena berritzea" da helburu nagusia, eta hainbat aldarri zehatz jarri dituzte mahai gainean: lan zamak arintzea, eros-ahalmena berreskuratzea, kategoriak egokitzea, enplegua egonkortzea, enplegu suntsiketaren aurkako neurriak hartzea edota lan osasun, berdintasun eta euskara planak garatzea, besteak beste.
Sindikatuek nabarmendu dute langileen kolektibo hori dela "lan baldintza prekarioenak" dituena hezkuntza publikoan, "baita pribatizazio prozesu handiena bizi duena ere". Era berean, "greba eskubidea baldintzatzea" leporatu diote Jaurlaritzari, "gehiegizko zerbitzu minimoen bitartez zein hauen aplikazioarako irizpide neurrigabeak ezarriz".