Aiaraldeko irakasleen %50 baino gehiagok babestu du hezkuntza publikoan deituriko greba

Aimar Gutierrez Bidarte 2025ko ots. 26a, 17:00
Deskargatu Info Ahotsak :

Jarraipen zabala izan du irakasleen hirugarren greba deialdiak. / Zaraobeko Irakasle Asanblada

Jarraipen zabala izan du LAB, Steilas, ELA eta CCOO sindikatuek hezkuntza publikoan deituriko greba egunak. Urtarrilean abiatu zuten greba zikloko hirugarren lanuztea egin dute gaur Aiaraldeko irakasleek.

Aiaraldeko ikastetxe publikoetako irakasleen %50ak baino gehiagok babestu du LAB, Steilas, ELA eta CCOO sindikatuek deituriko hirugarren greba eguna, Aiaraldea Komunikabideak egindako zenbaketaren arabera.

Urtarrilean abiatu zuten sindikatuek greba zikloa EAEko Unibertsitatez kanpoko hezkuntza publikoan, eta gaurkoa hirugarren eguna zuten irakasleek, urtarrilaren 22 eta 23ko lanuzteen ondotik. Iragan astean bi eguneko lanuztea egin zuten garbitzaile eta sukaldariek.

Irakasleen %50 greban

Urtarrilean baino apalagoa izan bada ere, irakasleen greba deialdiak babes zabala izan du eskualdeko ikastetxe publikoetan. Zentro handietan eragina izan du deialdiak: Laudio Institutuan irakasleen %62,5ak egin du bat lanuztearekin eta Zaraobe Institutuan %54koa izan da jarraipena.

Kontrara, Aretako Herri Eskolan eta Artziniegako Arteko Gure Ama ikastetxean izan du oihartzun gutxien lanuzteak: irakasleen %38 eta %25 batu da greba deialdira.

EAEn irakasleen hirugarren greba egunaren jarraipena %75ekoa izan da, sindikatu deitzaileen datuen arabera. Halaber, Hezkuntza Sailak ezarritako zerbitzu minimoak salatu dituzte LAB, Steilas, ELA eta CCOO sindikatuek: "Eusko Jaurlaritzak ezarritako gehiegizko zerbitzu minimoak direla eta milaka langileri greba eskubidea ukatu zaiela eta ondorioz, greba bera baldintzatua egon dela salatzen dugu. Hezkuntza sailak familiei bidalitako gutunak edota mahai negoziatzaileetan erakusten ari den jarrerak ere, ez dute laguntzen".

Zortzi aldarrikapen

“Lan baldintzak hobetu, hemen eta orain erabakita!” lelopean, LAB, Steilas, ELA eta CCOO sindikatu deitzaileek zortzi aldarrikapen zehatzetan bildu dituzte greba zikloaren aldarrikapenak:

  1. Lan zamak arintzea
  2. Gazteberritze plana ezartzea
  3. Hezkuntza publikoko langileek eros ahalmena berreskuratzea
  4. Enplegua egonkortzea eta bermatzea
  5. Azken urteetan Hezkuntza Sailak ezarritako murrizketak bertan behera uztea
  6. Ordezkoen lan baldintzak hobetzea
  7. Lana eta bizitza uztartzeko benetako neurriak ezartzea, zaintzaren ikuspegitik
  8. Lan-osasun, berdintasun eta euskara planak osatzea
Hezkuntza

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide