Kalean da Aiaraldea Hemen hamabostekari berria, 213. zenbakia alegia. Gai interesgarri ugari jorratzen ditu agerkariak 32 orrialdeetan bildu ditugun elkarrizketa, erreportaje eta bestelako edukien bidez.
Laudioko bi emakume elkarte erreferenteren historian sartu gara burubelarri martxoko lehenengo hamabostekari honetan. Horretarako Isabel Urkijo Azkarateren testigantza baliatu dugu. Avillo eta Solastiar elkarteei buruzko lan bana osatu du berriki Urkijok, elkarteen 30. urteurrena probestuz.
Inauterien irudi zaparradari ere tokia egin diogu hamabostekarian. Aiaraldeko kazetariok herriz herri ateratako ehunka argazkien lagin txikia atondu dugu hamabostekariko orrietan. Baina ez hori bakarrik, inauterien magiaz disfrutatzen jarraitzeko unitate didaktiko berezia prestatu dugu, Euskal Herriko eta Aiaraldeko inauterietako hainbat ohitura ezagutzeko parada eskainiz.
Hauek eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da argitalpena eskualdeko saltoki, taberna, ikastetxe, kulturgune, liburutegi eta kaleetan, doan.