Sorpresaz beteta dator Aiarako Biraren XXXV. edizioa. Gaur izango da lehen etapa, Laudioko Aldai plazatik abiatuta 16:00etan, eta antolatzaileek bezperara arte itxaron dute probaren azken xehetasunak emateko.
Hain zuzen, atzo arratsaldean egin zuten aurkezpena Laudioko Udaletxean, jendez betetako pleno aretoan. Hainbat erakundeetako ordezkariek hartu zuten hitza lehenbizi. Arabako Txirrindularitza Federazioko buruak nabarmendu zuen Araba dela biztanleko txirrindulari profesional gehien dituen lurraldea, “Esloveniaren atzetik”, eta horrek “zeozer” esan nahi duela. Aiarako Kuadrillako presidentea den Iñigo Pinedo Vadillok, aldiz, Aiarako Birak betetzen duen funtzioa goraipatu zuen, tokiko erakundetik proba hori babesten jarraituko dutela ziurtatuta.
Biraren bozeramaileak hartu zuen hitza jarraian, eta banan-banan aletu zituen txapelketaren sei etapen nondik norakoak. 251,4 kilometro egin beharko dituzte txirrindulariek guztira, 3.465 metroko desnibel positiboarekin, baina zaleek ez dute errepide ertzean egon beharko lasterketa jarraitzeko. Izan ere, zuzenean emitituko dituzte etapa guztiak probaren webgunean, motorretan joango diren kamerarien zein droneen irudiak baliatuta.
Parte hartzaileetan ere egongo dira sorpresak. Aurreko urteetan bezala, Euskal Herritik zein Espainiako Estatutik bertaratutako 33 talde arituko dira errepidean lehian, baina aurten “talde gonbidatu bat” ere batuko da tropelera: Turkiako Selekzio Nazionala. Txirrindulari horien parte hartzearekin, “nazioarteko proba” izatea lortuko du Aiarako Birak, atzo nabarmendu zutenez.
Horri lotuta, antolatzaileek nabarmendu dute Aiara Birak eragin ekonomikoa ere duela eskualdean. Izan ere, egin dituzten kalkuluen arabera, probaren 34 ediziotan zehar 100.000 pertsona inguruk bisitatu dute eskualdea guztira, “eta hori 100.000 kafe dira eskualdeko establezimenduetan, alojamenduak, bazkariak…”. Horregatik, horrelako ekimenek sostengu ekonomikoa behar dutela uste dute, eta eskerrak eman dizkiete aurtengo edizioa babestu duten erakunde publiko zein enpresa guztiei.
Probari buruzko xehetasunak emateaz gain, Aiara Txirrindulari Elkarteko Kadeteen taldea aurkezteko ere baliatu zuten atzoko ekitaldia, eurek parte hartuko baitute biran kanpoko beste taldeekin batera.
Aiaraldea Komunikabideak taldeko bi kiderekin hitz egin zuen gaurko eta hurrengo asteburuetako etapei begira dituzten asmoen inguruan:
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!