Amurrioko Mendiko Eskolak hartu zuen larunbatean Arabako Kuadrillarteko hirugarren finalerdia eta eskualdean geratu zen garaipena, Altubepekoak taldea izan baitzen onena, epaileen aburuz. Unai Mendibil, Iñaki Cabeza eta Serapio Lopez bertsolariak aritu ziren kantuan eta puntu gehien eskuratu zuen taldea izan zen eurena.
Josu Zabala laudioarrak egin zituen gai-jartzaile lanak eta Txiki Antia, Itxaso Balza de Vallejo, Hegoi Amabizka, Miren Beitia, Elena Cercadillo, Xabi Lasa eta Josu Olano Mendialdeko herritarrek osatu zuten Bertsoespuela taldea. Felipe Zelaieta, Rikardo Gonzalez de Durana, Garazi Gonzalez de Durana, June Astegieta eta Josu Ormaetxea bertsolariek, aldiz, Trebiñuko Jainkoaren seme-alabak taldean kantatu zuten.
Lehenik eta behin poteoa eta bazkaria egin zituzten eta gero hiru taldeetako bertsolariek lehen agurrarekin girotu zuten kanporaketa, soinekoak eta kitarrak besotan.
Jarraian, ariketa kolektiboei ekin zieten: atzekoak aurrekoari, ofiziotan 8ko txikian, 4 oinak, potokumeak, asmakizunak koplaka eta puntuka librean.
Epaileen puntuaketek garaipena eman zieten Altubepekoak taldekoei eta, hori dela medio, apirilaren 5eko finalean tokia izango dute. Asteburu honetan izango da azken finalerdia. Sarrerak hemen eros daitezke. Bazkarirako eta finalerako balio du txartelak eta aukera barazkijalea ere eskainiko dute.