Josu Imaz Murguiondok hartuko du Jesus Esmorisen lekukoa Tubacexeko kontseilari delegatu moduan. Hala jakinarazi du gaur multinazionalak Balore Merkatuaren Espainiako Batzordera bidalitako jakinarazpen baten bidez.
Zehaztu dutenez, apirilaren erdialdean sartuko da Imaz lanera, eta Jesus Esmorisekin batera arituko da lanean "trantzisio ordenatu bat" ziurtatzeko.
Industria ingeniaria da Imaz. 2012an sartu zen Ampo konpainian, eta CAF enpresan igaro ditu azken 13 urteak, lehen dibisioko zuzendari nagusi moduan.
Gogoratu beharra dago CAF enpresa Goierriko talde motoretako bat dela, baina azken urteetan polemikaren erdian ere egon dela, Israelentzat Jerusalengo tranbia eraikitzen ari baita. Proiektu horren bitartez, Palestinako lurralde okupatuetan ezarritako legez kanpoko koloniak hirigunearekin lotu nahi ditu estatu sionistak.
Hainbat kargu aldaketa azken urtean
Honakoa ez da azkenaldian Tubacexen egondako kargu dimisio bakarra. Izan ere, Francisco Javier Garcia Sanzek utzi egin zion Tubacexeko presidentea izateari iazko martxoan.
Garcia Sanz ez zen bakarra izan bere kargua uzten. Izan ere, multinazionaleko auditoria- eta betetze-batzordeko presidente Gracia Lopez Granadosek ere egin zuen, eta Jose Toribio Gonzalezek ordezkatu zuen.