42,2 milioi euro bideratuko dituzte Jaurlaritzak eta Foru Aldundiek guztira Aiaraldeko Eskualdeko Plan Estrategikora, hasieran aurreikusitakoa baino ia 2 milioi euro gehiago.
Hala adierazi du Arabako Foru Aldundiak, eta nabarmendu du 21 proiektu garatu dira orain arte, 20 milioi euro inbertituta guztira, "eta gainerako aurrekontua gauzatze-bidean dago". Zehaztu dutenez, "urte anitzeko programak" dira egiten ari direnak, eta planaren ardatz nagusiak garatuko dituzte.
Martxoko azken astean aurkeztu zuten planaren jarraipen txostena, eta bertan zehazten dira aipatutako datuak, Aldundiak azaldu duenez. Bere hitzetan, planak lortu du "eskualdeko egiturazko erronkei aurre egiteko funtsezko proiektuak eta eragileak mobilizatzea".
Martxoko azken astean aurkeztu zuten planaren jarraipen txostena, eta bertan zehazten dira aipatutako datuak, Aldundiak azaldu duenez.
Foru erakundeak gogora ekarri du 2020an ekin ziotela lehen urratsak emateari, "eskualdearen egoera sozioekonomiko konplexuaren" aurrean. "Parte-hartze prozesu sakon baten ondorioz, 2022an Berehalako Jarduera Plana (API) aurkeztu zen, lurraldeko premiarik larrienei erantzuten zieten 8 proiektu ultzatzailerekin eta 35 ekimenekin. Oinarri horretatik abiatuta, Eskualdeko Plan Estrategikoa egin zen", azaldu dute.
EH Bilduren kritikak
EH Bilduk plazaratutako hainbat kritiken ostean iritsi da Aldundiaren oharra. Jaurlaritzaren "geldotasuna" salatu zuen alderdi subiranistak, eskualderako berehalako jarduera plana "amaigabeko geldotasun plan bat" bihurtu zuela nabarmenduta.
Gauza ugari bota ditu faltan talde politikoak: “Laudio Glass Hub programan proiektu bat bera ere ez da martxan jarri, eraginkortasun energetikoa eta deskarbonizazioa handitzeko neurrien balantzea tamalgarria da, ez da euro bakar bat ere inbertitu lurzoru industriala berreskuratzeko eta Murgako industrialdea abandonaturik dago, nahiz eta Aiarako Udalak horren eguneratzea eskatu duen”.
Horregatik, “eskualdean ezartzen ari diren enpresak behar bezala ez babestea” egotzi zioten gobernuari.