1.118 plaza egongo dira orotara Laudio eta Amurrioko udalek egingo dituzten udaleku irekietan. Bi herrietako ekimenak izango dira euskara hutsez, eta ekainetik uztailera bitartean egingo dira.
Laudion, izen ematea datorren astetik aurrera
Laudion datorren asteko astelehenean irekiko dute izena emateko epea, maiatzaren 16ra arte. 50 plaza eskainiko dituzte 2009 eta 2014 urteen artean jaiotakoentzat, eta beste 576, aldiz, 2015 eta 2021 urteen artekoentzat, 144 plaza asteko.
Plazen %5 gordeko dira behar bereziak dituzten pertsonentzat, eta beste horrenbeste "egoera zaurgarrian dauden eta udaleko Gizarte-zerbitzuek zuzenean artatzen dituzten haurrentzat".
Izen emateak eskainitako plaza kopurua gaindituko balu, zozketa egingo lukete maiatzaren 26an, 12:30ean, Herriko Plazako Erabilera Anitzeko Aretoan.
Bost asteko iraupena izango dute udalekuek orotara, ekainaren 23tik uztailaren 24ra. Horrez gain, astean txango bat izango dute, eta 15 euroko kostua.
Uztailean izango dira bi udalerrietako udalekuak.
Amurrion, lizitazio bidean
Amurrion 5 eta 12 urte bitarteko 348 adingaberentzako tokia izango dute udalekuetan. Urtero bezala, "Oporretan ere Euskaraz" izena jarri diote programari, eta "ikasleen artean euskararen ahozko erabilera indartzea" izango da helburu nagusia, Udalak berak zehaztu duenez.
Mendiko Eskolan garatuko dute ekimena, eta "talde-dinamikak, egun osoko irteerak eta familiak inplikatzen dituzten jarduerak" egingo dituzte, "generoaren eta inklusioaren zeharkako ikuspegiarekin".
Hala azaldu du Txerra Molinuevok. "Euskararen erabilerarako espazio informalak sortzen jarraitzeko beharra” nabarmendu du alkateak, “gazteen artean batez ere”.
Zehazteke dute zerbitzua nork emango duen, lehiaketa egingo baitute horretarako. Aurrekontua gehienez 151.125,82 eurokoa izatea aurreikusi dute, eta ia 40 begirale kontratatzea orotara. Langile espezializatuak egongo dira tartean, behar bereziak dituzten haurrentzat.
10:00etatik 13:00etara egingo da programa, astelehenetik ostiralera. Egun osoko bi irteera egitea aurreikusi dute, eta baita “hainbat jarduera osagarri” ere. Besteak beste, familiekin ekintzak egitea planteatzen dute, “etxean ere euskararen erabilera sustatzeko”.