Olerkia gogoko dutenek bost ekitaldi izango dituzte adierazpen artistiko horrekin gozatzeko, Poetak Maiatzean ekimenari esker. Lehenengo hitzordua igandean izango da Urduñan 11:00etan Antzinako Andra Mariko santutegian. Zehazki, errezitaldia eskainiko dute otxomaioen testuinguruan.
Bigarren ekintza bikoitza izango da. Hasteko, umeentzako tailerra egongo da 17:30ean. Gero, 19:00etan, helduentzako beste tailer bat prestatuko dute, errezitatzen ikasteko. Proposamen biak maiatzaren 6an, asteartean, egingo dituzte Artziniegako liburutegian.
Maiatzaren 12an egitarau bikoitza egongo da berriz. Alde batetik, Amurriok Krzysztof Galas, Alina Galas eta Alicja Maria Kuberska poloniarren, Pedro Licona eta Clara Eugenia Ronderos kolonbiarren eta Pedro Licona eta Concha Garcia andaluziarren bisita izango du. 11:30ean Amaurre Ikastetxean errezitaldia egingo dute ikasleekin eta 18:30ean La Casonan modu irekian.
Bestetik, 12an ere, Grupo Klan-Destin@s taldeak ikus-entzunezkoak eta poesia uztartuko ditu Artziniegako udalbatza aretoan 18:00etan, Prefieren el jueves al infinito ikuskizunean.
Azkenik, Laudion ekitaldi inklusiboa egingo dute 11:30ean Kasinoan. Horretarako, Apdema elkarteko kidea den Aitor Cuestak bere olerki batzuk irakurriko ditu, tokiko beste zenbait sortzailerekin batera. Errezitaldia musikatua izango da.