Arabako Batzar Nagusietako Euskara Batzordeak EH Bilduk proposatutako ekimena onartu zuen atzo, Lanbide Heziketa dualeko praktikaldiak euskaraz eskaintzen dituzten enpresek dirulaguntza jaso dezaten.
Natxo Urkixo batzarkide laudioarrak aurkeztu zuen egitasmoa eta azaldu zuen euren bizitza akademiko osoa euskaraz egin duten hainbat ikaslek ez dutela aukerarik praktikaldian hizkuntza bera baliatzeko.
Hori aldatzeko, EH Bilduk iradoki zuen dirulaguntza lerroa ezartzea praktikaldiak euskaraz eskaintzen dituzten enpresentzat, pizgarri moduan.
PPk bat egin zuen ideiarekin, baina eskatu zuen aurretiko ikerketa egitea, argitzeko zenbat enpresa diren interesdunak eta zenbateko kopurua bideratu behar den.
EAJk eta PSE-EEk antzeko ekarpena egin zuten eta erantsi zuten Lanabes eta Eskuara programak sustatzen dituela Arabako Foru Aldundiak eta bide onena zela horien bitartez gauzatzea ikerketa eta dirulaguntza. Elkarrekin Podemos ere alderdi ororen iritziekin ados agertu zen.
Akordiorako tartea egon ahal zela ikusita, alderdiek atsedenaldia egin eta guztien nahiak asetzen zituen testua adostu zuten.
EH Bilduk oharra zabaldu du horren balorazio positiboa egiteko eta azaldu du "ikasleen jarraipena egiten duten begiraleen prestakuntzak dakartzan gastuak arintzeko helburua" izango duela dirulaguntzak.
Zehazki, mozioak Arabako Foru Aldundiari eskatzen dio lan praktikak euskaraz egiteko dauden premien azterketa egitea lau hilabeteko epean, Lanbide Heziketako ikastetxeekin eta enpresa munduko erakundeekin elkarlanean eta Lanabes egitasmoaren barruan, gerora enpresentzako prestakuntza duala euskaraz egiteko laguntzak eman ahal izateko.
Laguntza lerro hori enpresei, merkataritza sozietateei, kooperatiba sozietateei, enpresaburu indibidualei eta profesionalei egongo da zuzenduta. Horrez gain, Diputazioari eskatu diote Lanabes egitasmoan txertatzea euskarazko prestakuntza duala bultzatzeko neurri horiek.