Azaroan igo zen Barrrk taldea aurrenekoz eszenatoki batera, eta honezkero esku artean dute estudioko lehen lana. Walking About, sei abestiz osatutako EPa plazaratu berri dute, taldearen sinadura bilakatu den estilo "dantzagarri eta freskoari" eutsita. Etiketetatik ihesi jarraitzen du Laudio, Orozko, Bilbo eta Malagako lau lagunek osatutako bandak. Post-rock, post-punk, rock... ez dute euren burua estilo bakar baten barruan kokatu nahi.
Eten Espazio Sonoron grabatu dute Barrrk taldeko kideek haien lehenengo EPa. "Bi egun eman genituen grabaketa lanetan, eta laurok batera grabatu genituen kanta guztiak", azaldu diote Aiaraldea Komunikabideari.
Produkzioa eta masterizazioa La Kabaña eta Alvaro Olaetxearen esku egon da , EParen iruditegiaren diseinua, adiz, Asier Riosen lana izan da. Spotify-n eta Youtuben dago entzungai lana.
Orozko Rock
Larunbat honetan, maiatzak 24, Orozko Rock jaialdian kontzertua eskainiko du Barrrk bandak. Etxean arituko dira, lehen kontzertua eskaini zuten Jentilzulo Kulturgunetik metro gutxira eta. Oraindik ziurtatzerik ez duten arren, larunbaterako EPak formatu fisikoan izatea da taldekideen asmoa.