Atzo egin zuten Aiarako Kuadrillako batzarra eta Iñigo Pinedo presidenteari lanaldia luzatzea onartu zuten. Jardun osoa izango du aurrerantzean eta 44.000 euroko soldata gordina izango du urtero. Neurriak aurrera egin zuen EAJ eta PSE-EEren bozekin. EH Bildu abstenitu zen eta talde independenteek, aldiz, kontra egin zuten.
Aiara Batuz eta Okondo Aurreraren hasierako proposamena izan zen erabakia atzeratzea eta aurrerago egitea. Izan ere, zinegotzi independenteen aburuz, arrazoiak ez ziren sendoak, presidente berriak kargua hartu zuenetik ez baitira lanak aldatu eta ez da funtzionamenduan eraldaketarik gertatu. Batzorde kopuru bera dago hiruhilero eta lau sailetan daude banatuta.
Aiara Batuzek eta Okondo Aurrerak oharran azaldu dutenez, eztabaida sortu zuen euren iradokizunak eta EAJko bozeramaile Ander Añibarrok argudiatu zuen presidenteak dirulaguntza berriak bilatzeko baliatuko duela lanaldia, dirua aurrezteko Udalei. Halaber, jeltzaleak azpimarratu zuen presidente gisa sinatzea ardura handia dela.
Iratxe Parro Aiara Batuzeko kideak erantzun zion Kuadrillan badaudela 36 administrazio batzar eta presidente guztiek musutruk lan egiten dutela eginkizun berak beteta: dirulaguntzak bilatzea eta agiriak sinatzea arduradun nagusi bezala.