Gaur goizean Guardia Zibilak bi etxebizitza inguratu ditu Amurrioko herrigunean eta Gardea auzunean, 07:00ak aldera.
Gardeako auzokide batek aipatu du ez dietela eraikinetik irteten utzi operazioa hasi eta ordubete baino gehiago igarota ere.
Gutxienez, dozena erdi ibilgailuk parte hartu dute esku-hartzean eta baita kamuflatutako auto ugarik ere. Ertzaintzaren babesa ere izan dute. Polizia autonomikoak argitu dio Aiaraldea Komunikabideari Guardia Zibilaren ikerketa dela eta hedabidea Arabako Komandantziarekin jarri da harremanetan.
Guardia Zibilaren prentsa zerbitzuak adierazi dio Aiaraldea Komunikabideari ikerketa sumarioko sekretupean dagoela eta, ondorioz, ez dutela ezer zabalduko epaileen oniritzia izan arte. Komunikabideak galdetuta, agenteek aipatu dute hori ez dela gaur izango.
Gauzak horrela, hedabideak ezin du zehaztu atxilotuak egon diren, zer delitu mota ari diren ikertzen ezta operazioa soilik Aiaraldean den edota Espainiako Estatuko beste puntu batzuetan ere.
Informazio gehiago izan ahala joango gara albistea eguneratzen.