Arabako Foru Aldundiko landa eremuko etxebizitza komunitario guztiek gaueko zerbitzua eskainiko dute aurrerantzean. Horretarako, Foru Gobernu Kontseiluak 1,4 milioi euroko aurrekontua onartu du gaur, hau da, iazkoa %50ean handitu dute.
EH Bilduk aldarrikatu du bitartekoak biderkatu direla aurrekontuetan behartutako akordioari esker. Aldundiak berak ere gogoratu du: "Azken berrikuntza hori Arabako Foru Aldundiaren 2025erako aurrekontuak onesteko EH Bildurekin egindako akordioaren emaitza da. Etxebizitza komunitarioetarako adostutako aurrekontu-partida 532.000 eurokoa izan zen".
Berez, gaueko zerbitzua bazegoen indarrean Amurrioko etxebizitzetan, baina hemendik aurrera Arabako Foru Aldundiak hartuko du bere gain finantzazioa, Udalak ordaindu ordez. Egoera berean zegoen Laguardia, baina Kanpezun, Asparrenan eta Gaubean udan hasiko dira gauez ere zerbitzua ematen.
EH Bilduren agerraldia
Koalizio subiranistak mezua zabaldu zuen atzo eta Eva Lopez de Arroyabe taldeko bozeramaileak hala adierazi zuen Batzar Nagusietan: "Kalitatezko zaintzak herrian bertan jasotzea da EH Bilduren lehentasunetako bat, eta urrats bat gehiago da hau bide horretan. Herrietatik bertatik ematen den arreta balioetsi nahi dugu, pertsonen ingurune hurbilari eustea oinarrizkoa delako egoera zaurgarrietan".
Etxebizitza komunitarioak
Arabako Foru Aldundiak argitu duenez, mendekotasun moderatua (1. maila) duten adinekoentzako bitartekoak dira etxebizitza komunitarioetakoak, kalitatezko arreta jasotzeko. Gizarte laguntza eta gainbegiratzea, eta arreta pertsonala eta etxeko laguntza dauzkate.
Helburu nagusia da erabiltzaileek beren ingurune komunitarioan jarraitu ahal izatea, horrela haien autonomia hobetu eta bakartasun egoerak ekiditen baitira.
Gaueko zerbitzuari dagokionez, arreta ematen die hainbat arrazoirengatik (bereziki, psikikoak edo neurologikoak) gaueko ordutegian intentsitate ertaineko edo handiko ikuskapena behar duten pertsonei, loaren erritmoa eta gaueko portaera kontrolatzeko eta erregulatzeko.
Grebak etxebizitza komunitarioetan
Zaintza zerbitzua, edonola ere, alde ilunak ere bizitzen ditu egunotan. Izan ere, azken asteetan etxebitza komunitarioetan greba egunak antolatu dituzte eta atzo bertan batu ziren sindikatuak eta patronala negoziazio mahaian.
ELAk balorazio oharra plazaratu zuen eta oso irakurketa ezkorra egin zuen egoerari buruz. Bere ustez, patronalak ez du akordiorik nahi.
Sindikatuak salatu zuen atzoko eskaintza duela urtebetekoa baino okerragoa izan zela eta sindikatuen eta Aldundiaren aurkako xantaia erabili dutela: "Hitzarmenaren etorkizuna laguntza ekonomiko gehiago jasotzearekin lotzen dute. Are gehiago, zenbait planteamendutan Langileen Estatutua okertzea eta legeriatik kanpo kokatzea bilatzen da".
Gauzak horrela, ELAk atea irekita utzi dio mobilizazioekin jarraitzeari: "Hain prekarioa den sektore feminizatu honetarako akordio bat lortzeko une historikoaren aurrean geunden. Dinamika mobilizatzailean 6 urte baino gehiago igaro ondoren, kolektibo horrekiko ia betebehar sozial eta politikoa da bere lan baldintzak hobetzea lortzea. Bada, patronalek ez dute egoera ulertu, eta beren lan-baldintzen prekarizazioa erabiltzen dute negozioa egiteko. Langile guztien lan baldintzak eta baldintza ekonomikoak benetan hobetuko dituen hitzarmen bat egon arte, ELAk grebak egiten jarraituko du. Zaintza-sektorearen baldintzak duintzeko unea da".