EH Bilduk Aiaraldea biziberritzeko Berehalako Ekintza Plana (BEP) ezartzeko eskaria eraman du Eusko Legebiltzarreko Ekonomia, Lan eta Enplegu Batzordera. Koalizioak adierazi duenez, 2024an amaitu behar zen Aiaraldea biziberritzeko egitasmo hori, "baina gaur egun oraindik ez da bete" eta horrek, gainera, ekarri du bertan jasotzen ziren neurri batzuk "desfasatuak geratzea".
Betetzeke dauden ekintzen artean hauek aipatu ditu, besteak beste, Itxaso Etxebarria legebiltzarkideak: "Laudio Glass Hub-en bidez Aiaraldea beiraren sektorean erreferentzia nazionaleko eta nazioarteko hub gisa kokatzea edo Aiaraldea Industrial Lab-en startup-ak erakartzea, sortzea eta azeleratzea, industria-sektore nagusietan bereziki".
Era berean, EH Bilduko kideek ohartarazi dute langabezia tasari dagokionez, Aiaraldeko egoera ez dela gehiegi aldatu Legebiltzarrean horri buruzko ponentzia bat egitea proposatu zutenetik, eta orduantxe Laudioko langabezia-tasa % 13,45ekoa bazen, eta Amurriokoa % 14,07koa, gaur egun % 12,32koa eta % 14,27koa dira, hurrenez hurren.
"Lankidetza eta egingarritasuna"
"Lankidetza eta egingarritasuna". Bi alderdi horiek betetzea eskatu dizkie EH Bilduk Aldundiari eta Eusko Jaurlaritzari. Azken horri, bereziki, "hautatutako lerro eta neurriak eskualdeko udalekin lankidetzan berrikusi ditzala" eskatu dio, "ahalik eta eraginkortasun eta adostasun maila altuena lortze aldera".
Aiaraldetik bertatik jardutean egin dute azpimarrarik handiena, eta "eskualdetik esaten ari direna" eraman dute Ekonomia, Lan eta Enplegu Batzordera, alegia, "Aiaraldeko berehalako ekintza-plana amaigabeko ekintza-plan bihurtu dela, eta Aiaraldeak ezin duela gehiago itxaron".