Larunbatean Zumaiara jo zuen Aiala Txirrindularitza Elkarteak eta podiuma zapalduta itzuli zen etxera. Hain zuzen, Xabier Solaunek bigarren zeharkatu zuen helmuga, esprintean.
Horretarako lan txukuna egin behar izan zuten. Lehenik eta behin, ihesaldi guztietan sartu ziren eta gero ondo kokatu ziren esprintean. Izan ere, ez zen ezustekoa izan horrela erabakitzea proba eta 43 kilometro orduko batez bestekoa egin zuten txirrindulariek.
Ander Colmenero ere lehen hamarren artean egon zen, bederatzigarren postua eskuratu baitzuen.
Uztailaren lehen asteburuan lehen podiuma
Uztailaren 6an heldu zen eskualdeko taldearen denboraldiko podiuma Sorian, baina zapore mikatza utzi zien. Berez, Ander Colmenero hirugarren izan zen, baina ezin izan zuen bere indar guztia baliatu. Matxura mekanikoa izan zuen helmugara heltzeko bi kilometro falta zirela eta ezin izan zen lehiatu azken esprintean garaipena erdiesteko.
Colmenerok ere zorte txarra izan zuen astebete lehenago Txuma Memorialaren barruan Leioan izandako etapan. Ondo kokatuta zegoen lasterketan, baina txirrindula matxuratu zitzaion.
Dena den, izandako azken bi podiumekin, Aiala Txirrindularitza Taldeak egindako denboraldi ona islatu du. Izan ere, martxotik hona bere kideek hainbat aldiz lortu dute lehen hamar sailkatuen artean egotea eta podiuma ia ukitzea, lasterketak laugarren amaituta.