ELA sindikatuak oharra zabaldu du salatzeko larrialdiak ez diren kasuak artatzen dituen enpresak ez duela legea betetzen. Konpainia hori Bizkanb da eta Alsa taldeko Sanir anbulantzia enpresak eta Baztan-Bidasoa anbulantziek osatzen dute. Berez, Galdakaoko Barrualdea hartzen dute bere gain, Aiaraldea barne.
Iaz hasi zen zerbitzua ematen Bizkanb, Grup La Pau ordezkatuta. Azken enpresa horrek milioi bat euro inguru ordaindu gabe utzi zien langileei, baita 800.000 eurotik gorako zorra ere foru ogasunarekin.
Gauzak horrela, eta Eusko Jaurlaritza garraio sanitarioaren zerbitzua esleitzeko deialdiaren atarian egonda, ELAk aldarrikatu du osasun garraioa ezin dela azpikontratatua egon eta erabat publikoa izan beharko litzatekela.
Soldatak txarto ordaintzea
Langile erakundeak honakoa azpimarratu du: "Hasieratik, nominetan akatsak egin dituzte, eta batzuetan ez da bere osotasunean ordaindu. Lan ikuskaritzaren aurrean salatu zuen ELAk egoera, eta baita ez zeudela eginda berdintasun eta jazarpen plan eta protokoak ere. Bestetik, aurreko enpresarekin ordaintzeke zeuden abonuak maiatzean hasi ziren ordaintzen, ez lehenago".
Enpresak ez du paziente kutsakorren protokoloa bete eta anbulantzia berean garraiatu ditu COVID-19 zuten eta dialisia zuten pazienteak.
Gaixo kutsakorren protokoloa bete gabe
Sindikatuarentzat are larriagoa da Bizkanbek nola jokatu duen zenbait gaixo kutsaturekin, protokoloa bete gabe: "Anbulantzia partekatu dute COVID-19 duen eta dialisia behar duen pazienteek. Era berean, anbulantziak homologatuta ez dauden beste helburuetarako erabili nahi izan dituzte (larrialdiak anbulantzia kolektiboetan, adibidez, gutxieneko dotaziorik gabe)".
Lan istripuak
ELAk salatu du, gainera, erabiltzaileena ez ezik, langileen osasuna ere jokoan jartzen duela enpresak eta astero hiruzpalau istripu dituztela beharginek: "Enpresak uko egin zion langileen osasuna babesteko azterketa ergonomikoa aplikatzeari. Gainera, sindikatuen eta laneko arriskuen prebentzioko ordezkarien lana etengabe boikoteatzen saiatu dira".
Astero hiruzpalau istripu dituzte zerbitzuko langileek, sindikatuak salatu duenez.
Desoreka zuzendaritzan
Azkenik, langile erakundeak gaineratu du 460 langile direla eta zuzendaritzan 50 lagun daudela. ELAk aipatu du, halaber, behar baino anbulantzia gutxiagorekin funtzionatzen dutela: "Atzeratu daitezkeen larrialdietarako eta asaldatutako pazienteak ospitaleratzeko hiru anbulantzia behar ziren arren, bakarra dago 9:00etatik 21:00etara gutxieneko langile kopuruarekin".