Mihi urdina Bizkaian hedatu ez dadin, txertaketa indartu nahi du Foru Aldundiak, eta horretarako dei egin dio abeltzaintzaren sektoreari. Behiei, ardiei zein ahuntzei (animalia hausnarkariei) eragiten die birusak, eta 3 serotipoaren kasuak antzeman dituzte Kantabrian eta Ipar Euskal Herrian, foru erakundeak jakitera eman duenez.
Era berean, Vocento taldeak argitaratu du Iurretan detektatu dituztela beste bi kasu eta beste foku bat Mena Haranean. Hedatzen jarraitu ez dadin sendotu nahi dute kanpaina, zeina apiriletik dagoen abian.
Culicoides generoko eltxoek transmititzen dute mihi urdinaren birusa eta 3 serotipoa da, egun, arazo gehien sorrarazten dituena: "behietan sintoma klinikoak eragiten ditu, eta ardien heriotza-tasa % 15era artekoa da", azaldu du foru erakundeak.
Erabat doakoa
Gogoratu dutenez, erabat doakoa da abereak txertatzea, Aldundiak finantzatzen baitu % 100. Ustiategi bakoitzeko albaitariak egin dezake txertaketa, edo hala nahi izanez gero, urteko saneamendu-kanpainaren barruan ere egin daiteke.