Lamuzako "gazteluaren" birgaitzea, Urisandi bidearen egokitzapena eta Artziniegako Erlojuaren Dorrearen konponketa aurkeztu dituzte Arabako aurrekontu parte hartzaileetara

Txabi Alvarado Bañares 2025eko uztailaren 29a
Deskargatu Info Ahotsak :

Artziniegako Erlojuaren Dorreko erlojuaren birgaitzea izan da aurkeztu duten proiektuetako bat.

Araba osoko 21 proposamen jaso dituzte guztira, baina "bideragarritasunaren azterketa ekonomikoa" betetzen dutenak soilik igaroko dira herritarren bozketa-fasera. 

21 proposamen aurkeztu dituzte guztira Arabako Foru Aldundiaren 2026ko Aurrekontu parte-hartzaileetara, eta horietako hiru dira Aiaraldekoak. 

Alde batetik, Lamuzako "gaztelua" bidezidorren sarearen informazio-zentro gisa birgaitzeko proposamena sartu da 2.000 biztanletik gorako udalerrien kategorian.

Eskualdeko beste bi proposamenak, aldiz, 2.000 biztanletik beherako udalerrien kategorian daude. Okondoko Urisandi bidea egokitzean datza horietako bat, eta Artziniegako Erlojuaren Dorreko ordulariak zaharberritzean, aldiz, bigarrena. 

Hemen ikus daitezke aurkeztu diren proiektu guztiak. 

Herritarren bozketaren bidez ebatziko da 21 ekimen horietako zeintzuk egingo diren. Hala ere, hori baino lehen, bideragarritasunaren azterketa ekonomikoa egingo dute egitasmo guztiekin. "Irizpide ekonomikoak, juridikoak, teknikoak eta foru-eskumenekoak" betetzen diren baloratuko dute hor, eta langa hori gainditzen dutenak soilik igaroko dira bozketa fasera. 

Jendartea

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide