Kalean da Aiaraldea Hemen hamabostekariaren ikasturteko lehenengo zenbakia, 220. zenbakia alegia. Irailari ongi etorria ematearekin batera, udako festek utzitakoari erreparatu diogu. Aiaraldea Komunikabideko kazetariok eta boluntarioak festarik festa aritu gara argazki kamera eskutan, eta egindako lanaren zati txiki bat ekarri dugu paperera.
Bestelako kontuak ere jorratu ditugu, hala nola Euskalgintza Kontseiluak eskualdeko hamabi ikastetxerekin abiatutako Euskara gabe ez gara kanpaina.
Gaiaren inguruan gehiago sakontzeko asmoarekin, manifestura batu diren ikastetxeetako arduradunekin elkarrizketa segida abiatu dugu. Euskalduntzea arriskuan dagoela diote eskualdeko hezitzaileek, eta horren atzean dauden arrazoiak aletu nahi izan ditugu.
Iritzi atala
Atal berria estreinatu dugu hamabostekariaren zenbaki honetan. Aurrerantzean iritzi atala aurkituko du irakurleak agerkariaren barruan, eskualdeko iritzigile desberdinen testuekin osatua. Lehenengo zenbaki honetan, Koldo Gilsanz, Bambi, Ane Arandia eta Imanol Arberas elkartu ditugu kontu-kontari.
Hauek eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da argitalpena eskualdeko saltoki, taberna, ikastetxe, kulturgune, liburutegi eta kaleetan, doan.