Aiaraldeko udalerri guztiek bat egin dute Gurasoleku ekimenarekin, ikastetxeen bitartez (horregatik Arakaldo da salbuespen bakarra, hezkuntza zentrorik ez duelako).
Programaren helburua da familiak inplikatzea euskalduntze prozesuan (transmisioan, erabileran, espazio aproposak ahalbidetzen...) eta horretarako hiru ildo eskaintzen ditu:
- Guraso euskaltegia: Euskara ikasteko aukera emateko.
- Gurasolagun: Guraso taldeak sortzen euskara praktikatzeko. Parte hartzaileek erabaki dezakete bidelagun edo bidelari izan. Lehenengoek hizkuntza menperatzen dute eta bigarrenei laguntza eskaintzeko prestutasuna dute.
- Gurasolagun Agenda: Aisialdi eskaintza egiten du euskarazko jarduerak eskura jarrita.
Inskripzioa egiteko dokumentua hemen deskargatu daiteke.
Aurkezpen jaia
Programaren lehen ekintzak aurkezpenak izango dira, Okondon eta Artziniegan. Okondon irailaren 24an egingo dute eta Artziniegan 25ean. Azken egun horretan puzgarriak, tailerrak eta talde argazkia antolatuko dituzte.
Baliabideei dagokienez, motibazioa lantzeko bideoak eta Euskararen Erreminta Kutxa zabalduko dituzte gurasoen artean Aiaraldeko Euskalgintza Kontseiluak, AEK-k, Laudioko Udal Euskaltegiak, Udaberria Euskaltegiak eta eskualdeko ikastetxe eta haurreskolek.
Halaber, bidean da Euskara-Arabiera-Amazigera hiztegia, ikasturtean argitaratuko diren hiru poltsiko hiztegietako lehena.