Atzo 18:30ean mobilizazio jendetsua egin zuten Donostian, Zinemaldiaren testuinguruan, Gazan gertatzen ari den genozidioa salatzeko, eta eskualdeko hiru herritarrek eman zioten babesa. Hain zuzen, zinemaren munduko 350 atxikimenduen artean, Esti Urresolarena, Miren Gaztañagarena eta Agurtzane Intxaurragarena egon ziren.
Izan ere, Palestinaren aldeko antolakundeek ez ezik, Euskal Aktoreen Batasuna elkarteak ere deitu zuen atzoko manifestazioa eta euskal profesional ugari batu ziren ekimenera: Sara Fantova, Paul Urkijo, Alauda Ruiz de Azua, Eneko Sagardoy, Fermin Muguruza, Itziar Ituño edota Jone Laspiur.
Nazioarteko izen oso ospetsuak ere ez ziren falta izan sostengua eskaintzeko: Paul Laverty, Penelope Cruz, Javier Bardem edota Pedro Almodovar.
Mobilizazioaren testuak exijitu zuen Israel Nazio Batuen Erakundean ez geratzea, Israelekin arma-merkataritza amaitzea eta euskal enpresek genozidioan izan dituzten konplizitateak aipatzea.
Azken puntu horretan bereziki nabarmendu zuten CAF enpresaren ardura: "CAF euskal tren-enpresa NBEren zerrenda beltzean sartu dute, lotsarik gabe Jerusalem eta Israelen legez kanpoko kokalekuak lotuko dituzten tren-lineak fabrikatzeagatik. Dagoeneko 14.000 palestinar baino gehiago kanporatu dituzte kokaleku horietatik. Gainera, enpresako zuzendaritzak eta Eusko Jaurlaritzak (% 3aren jabea) ez diote jaramonik egiten Albanese txostenari, zeinaren arabera tren hau garbiketa etnikoko eta genozidioaren kolaborazioko krimena den".