Laudion jokatu zuten Arabako eskola kiroleko lehiaketa larunbatean. Adei Font laudioarrak irabazi zuen eta Unai Llano izan zen hirugarren haur kategorian. Kimuen kategorian Ekaitz Echevarria izan zen bigarren eta Aiur Bordagaray hirugarren mutilen artean.
Naroa Gonzalez izan zen nesken bigarren postua eskuratu zuena. Benjaminei dagokienez, Maider Bordagaray izan zen txapelduna eta Nerea Moreno hirugarrena.
Jardunaldiak parte-hartze bikaina izan zuen, Arabako eskola guztietako haur eta gaztetxoekin, baita oraindik inolako eskolatan ez dauden baina parte hartu eta esperientzia bizitzeko aukera izan zuten neska-mutil batzuekin ere.
Denboraldiko proba guztiak zabalik daude, hain zuzen ere, horretarako: txikiek esperimentatu, ondo pasa eta txirrindularitzaren mundura hurbil daitezen.
Laudioar Txirrindulari Elkarteak adin-talde bakoitzera egokitutako ibilbide polita prestatu zuen.
Txikienek igoerak, bihurguneak eta jaitsierak zituen zirkuituaz gozatu zuten, eta parte-hartzaile guztiek ederki pasa zuten.
Bestalde, kimuak eta haur kategoriakoak zailtasun handiagoko ibilbidean lehiatu ziren; igoera eta jaitsiera zorrotzek emozio handia eman zioten lasterketa guztiei.
Argazkiak: Txemi Llano