Bost urteko ibilbidea egin du Gurasoleku ekimenak, eta geroz eta arrakasta handiagoa ari da izaten, Aiaraldeko Euskalgintza Kontseiluko kideek nabarmendu dutenez. Aurten eskualde osora zabaldu da programa, Amurrio, Laudio, Urduña, Orozko, Arrankudiaga, Aiara, Okondo eta Artziniegako ikastetxeetara helduta, eta 166 izen emate egon dira guztira, inoiz baino gehiago.
Gauzak hala, bost urteetako datuak batuta, 503 pertsonek eman dute guztira izena Gurasolekun. Hiru egitasmo barnebiltzen ditu ekimenak: Gurasoeuskaltegia (euskara ikasteko), Gurasolagun (berba egiten trebatzeko) eta Gurasolagun agenda (familian egiteko euskarazko aisialdi eskaintza). Azken horrek du arrakastarik handiena, aurten egondako 166 izen emateetatik 106 izan baitira ekimen horretarako.
Beste zifra global batzuk ere eman dituzte ekimenaren sustatzaileek: 24 ikastetxe eta haur eskolek hartu dute parte bost urtetan, gurasoentzako 19 saio egin dituzte, irakasleentzako 6, eta baita bi aurkezpen publiko ere, Kirikiño aisialdi taldearekin elkarlanean. Modu horretan, 1.222 ikasle eta haurren familiengana iritsi direla kalkulatu dute.