Aste honetan erabaki dute epaimahaiko kideek nortzuk izan diren aurtengo Udako Postal Lehiaketako irabazleak. Maied Urrutia argazki irakasleak (Amurrioko Kultura Etxean klaseak eskaintzen dituenak, besteak beste) bi hautatu behar izan ditu.
Hasteko, Filipinetako ur argitan irudia izan da argazki postal onena. "Ezohiko perspektiba du eta konposaketaren aldetik interesgarria iruditu zait" adierazi du adituak. Lan horren egilea Nerea Isusi Sanz izan da eta Sobron abenturako parkean 6 pertsonarentzako esperientzia eskuratu du.
Aiaraldea Kooperatiba Elkarteko bazkideen artean banatu den aitortza Ainhoa Ayestaren Bakardadea argazkiarentzat izan da. Urrutiak aipatu du "intentzio poetikoa adieraztea lortu duela". Ayestarentzat izango da bi pertsonentzako eguneko menua Bideko jatetxean (50 eurotan baloratuta).
Azkenik, berrikuntza gisa, Aiaraldea Komunikabideak proposatu zuen bideo formatuko irudi estatikoen kategoria, non Maialen Ginea izendatu duen irabazle Julen Zubiete zinemagileak. Orozkoarrak arrazoitu du Egunsentia Sonabiatik lana saritu duela "irudi eta soinu lasai eta atseginez bideopostalaren formatuari era egokian adaptatuz udako momentu bereizgarri bat era erakargarrian erretratatu" duelako. Horregatik, enoturismo esperientzia eta bi pertsonentzako menua Artomaña Txakolindegian izango ditu Gineak.
Hurrengo egunetan Aiaraldea Komunikabidea irabazleekin jarriko da harremanetan sarien berri emateko.
Guztira, 115 lan aurkeztu dituzte parte-hartzaileek lehiaketan. Horietako 110 argazkiak izan dira (asko maila artistiko handikoak) eta bost bideo.