Datorren astean ekingo diogu Aiaraldea Komunikabidetik Azalera podcastaren denboraldi berriari. Aurreko ikasturtean bezala, ordubete inguruko saioa izango da, eskualdeko gaurkotasuna ardatz izango duena. Zuzenean ikusi ahalko da ostegunero, 13:00etan, Aiaraldea.eus atarian eta komunikabidearen gainontzeko plataformetan.
Eskualdeko aktualitate instituzionalaren jarraipenak presentzia nabarmena izaten jarraituko du programan. Aiaraldea Komunikabideak eskualdeko alkate guztiei luzatu die saioan elkarrizketatuak izateko gonbidapena. Gauzak hala, datorren asteko ostegunean Ainize Gastaka bertaratuko da magazinera, udalerriko gaurkotasunezko gaien inguruan mintzatzera.
Herritarrek ere aukera izango dute elkarrizketan parte hartzeko, galderak aurretik bidalita. Horretarako, audio bat bidali beharko dute plazaratu nahi duten galderarekin 688 84 81 52 telefonora (Whatsapp edo Telegram bidez) edo erredakzioa@aiaraldea.eus helbidera, euren izen-abizenak zehaztuta. Astelehenean (urriak 20) itxiko da horretarako tartea, 21:00etan.
