Kalean da Aiaraldea Hemen hamabostekariaren zenbaki berria. Saida El Bakaliren testigantza jaso dugu azalean. El Bakali adingabea zela iritsi zen Espainiako estatura, hamaika urte daramatza Laudion bizitzen, eta gazte zein familia migratuak artatzen egiten du lan gaur egun. Geroz eta gehiago hedatzen ari den oldarraldi arrazistaren inguruan luze mintzatu da gurekin.
Arrazismoari aurre egiteko eta elkarbizitza eta gizarte kohesioa lantzeko bide izan daiteke ere Aiaraldeko Euskalgintza Kontseiluak eskualdeko hamabost ikastetxetan sustatutako Aiaraldeko Hizkuntzen Mapa dinamika. Ikasleek egindako lanaren datuak bildu ditugu, ikasgeletan lantzeko proposamen didaktiko desberdinekin batera.
Askoz gai gehiago
Baina kontu gehiago landu ditugu agerkariko 32 orrialdeetan. Aitziber Duarte zeramikagileak Balintxa baserriko ateak zabaldu dizkigu, esaterako. Sorkuntza artistikorako espazio irekia atondu nahi du Duartek gurasoen jatetxeak utzitako hutsunean.
Hauek eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da argitalpena eskualdeko saltoki, taberna, ikastetxe, kulturgune, liburutegi eta kaleetan, doan.