ELA sindikatuak oharra zabaldu du salatzeko Alavabus zerbitzuko gidariek aurre egin behar dietela bidaiarien erasoei, bai ahozkoak zein fisikoak. Egoera horren iturria da tiketen erreserba egiteko sistema "guztiz zaharkituta" dagoela. Ondorioz, bezero askok, bidaia aurretik ordaindu arren, gero ezin dute egin, autobusak beteta baitaude.
Arriaga, La Unión eta Líneas Regulares enpresetako 80 langile baino gehiago (Arabako 16 zerbitzutako operadoreak) dira egoera horretan daudenak eta sindikatuak azpimarratu du eurak direla aurpegia eman behar dutenak bidaiarien amorrua azaleratzen denean.
Halaber, ELAk nabarmendu du garraio publikoa erabiltzea oinarrizko eskubidea dela eta egun urratzen ari dela Araban, ezin baita aukera bermatu erreserbak egiteko operatiboa ez den sistemarekin.
Gauzak horrela, sindikatuak premiazko neurriak exijitu ditu, Aldundiak ez baitu berehalako esku hartzerik aurreikusi. "Arabako Foru Aldundiko Garraio Zuzendaritzarekin egindako bileretan egoera jarri da mahai gainean, baina ez zaigu epe laburrean inolako konponbiderik eskaini. Are gehiago, ez zaigu bileraren aktarik helarazi, gardentasuna eta beharrezko elkarrizketa zailduz. Enpresek ere ez dute inolako neurri eraginkorrik hartu egoerari aurre egiteko".