Gasteizko Gran Hotel Lakuak hartu zituen atzo arratsaldean Arabako Merkataritza eta Zerbitzuen XXII. Sariak eta eskualdeko ordezkari anitz bertaratu ziren. Izan ere, Aiaraldeko bi denda saritu zituen AENKOMER merkatari arabarren elkarteak.
Zehazki, Amurrio Plazak enpresa erreleboaren garaikurra jaso zuen. Berez, negozioa sortu zutenek belaunaldi berri baten esku utzi dute. Estibaliz Plazak hartu zuen aitortza, baina berak ez du ahaztu nahi izan talde lana egiten dutela: "Ni argazkietan atera naiz eta saria hartu dut, baina Leire Plaza nire ahizpa eta Josu Santa Cruz badaude ilusio eta indarrarekin gure enpresan lan egiten".
Nina Life Styling dendak ere AENKOMERen atentzioa erakarri du eta berrikuntzaren saria eurentzat izan da. Gaur bertan Aiaraldea Komunikabideari adierazi diote oso pozik daudela.
Bestalde, Txerra Molinuevo Amurrioko alkateak eta Ainize Gastaka Laudioko udalburuak ere parte hartu zuten ekimenean, baita Jon Aspuru AENKOMEReko presidenteak eta Irma Basterra Arabako Batzar Nagusietako presidenteak ere. Arabako Foru Aldundiko eta Eusko Jaurlaritzako ordezkariak ere ez ziren falta izan: Ramiro Gonzalez, Cristina Gonzalez eta Javier Hurtado. Gasteizko alkatea ere bertaratu zen.