Ostiralean ArteOn gazte abesbatza Bilbao Arena estadioko oholtza nagusian egongo da Ei! Bilbao egitasmoan. 2.500 ahots gehiagorekin kantatuko badute ere, leku pribilejiatua izango dute laudioarrek Huntza, Doctor Deseo, Süne, Sorotan Bele edota Celtas Cortos artista ezagunekin abesteko.
Kontzertua Fair Saturday ekimenaren barruan dago eta bere helburua da Black Fridayri aurre egitea. "Kontsumismoaren ordez, Fair Saturdayk elkartasuna sustatzen du, eta jarduera guztien xedea da elkarteak laguntzea", adierazi du Felix Primo ArteOneko presidenteak.
Berez, ArteOnek hasieratik parte hartzen du elkartasun ekimen horretan eta horregatik egongo dira orkestraren alboan oholtza nagusian.
Primok azpimarratu du abesbatzaren asmo oso garrantzitsua dela, musikaren zaletasuna sustatu ez ezik, balio positiboak ere transmititzea: "Pasa den astean Guggenheimen abestu genuen, Unicefek gonbidatuta. Erakunde horren balioekin bat egiten dugu eta poz-pozik kantatu genuen".
Ezina ekinez egina eta Julen Burgos larunbatean
Baina abesbatza ez da Fair Saturdayra batuko den bakarra. Izan ere, Ezina ekinez egina dokumentala proiektatuko dute Guggenheimen larunbatean 18:00etan eta sarrera doakoa izango da. Ikus-entzunezko lana Dame 1 Minuto de Salud lehiaketaren irabazlea izan da eta horregatik antolatu dute emanaldia.
Izen bereko elkartearen lana deskribatzen duen dokumentala ikusi ondoren, mahai-ingurua egongo da Jose Miguel Llano zuzendari amurrioarrarekin eta Abel Fernandez 'Spiderabel'-ekin, elkarteko kidea baita.
Bestalde, Julen Burgos bakarlari laudioarrak kontzertua eskainiko du Riberako azokan 14:00etan.
