Hirutik bi. Laudiok eta Artziniegak aurkeztutako proiektuek aurrera egitea lortu dute Arabako 2026ko Aurrekontu Parte-hartzaileetan. Foru Aldundiak aste honetan egin ditu publiko bozketa fasearen emaitzak. Gauzak horrela, diru-partida bana jasoko dute Lamuza Parkeko bidezidorren birgaitzeak eta Artziniegako Erlojuaren Dorreko konponketak.
Laudioko kasuan arrakastatsua izan da Kulturlabek sustatutako kanpaina. Kultur egitasmoak Arrañoko Gazteluaren birgaitzea eta Lamuza Parkeko bidezidor sarea konpontzeko proiektuaren alde botoa ematera animatu zituen herritarrak, eta mila lagunen babesa lortu dute.
"'Arrañoko Gaztelua izenekoaren berreraikuntza amaitzea eta parkeko bidezidorren sarea birgaitzea proposatzen da, elementu hori (monumentu-multzoaren talaia eta begiratoki pribilegiatu gisa diharduena) bidezidorren sare horren ardatz bihurtuz, eta, gainera, bizilagunentzako gizarte-zentro gisa erabiltzeko aukera emanez". Horrela aurkeztu zuten proiektua Kulturlabeko kideek iragan irailean, bozketa fasea ireki berritan. Kultur eragilearen iritziz, proiektua garatzeko aukera berri honek "mugarri berri bat" jarriko du Lamuza Parkearen hobekuntza prozesuan.
2.000 biztanletik gorako kategorian egin du aurrera Laudioko proiektuak. Kategoria berdinean hautagai zegoen ere Luiaondoko frontoiko estalkia aldatzea eta plaka fotovoltaikoak instalatzea aurreikusten zuen proiektua. Aiarako egitasmoak, ordea, ez du Aurrekontu Parte-hartzaileetan hautatua izateko behar besteko bozkarik lortu, eta gutxieneko quorumaren azpitik geratu da.
Artziniegako Erlojuaren Dorrea
Artziniegako Udalak aurkeztutako proiektua izan da Aurrekontu Parte-hartzaileetan aukeratutako eskualdeko bigarren proiektua. Tokiko Gobernuaren asmoa Artziniegako Garai Plazako Erlojuaren Dorrea zaharberritzea da. Artziniegako 70 herritarren babesa jaso du egitasmoak. Zehazki, dorrearen bi erlojuak martxan jartzeko baliatuko dute diru-partida.
XIX. mendean altxatu zuten Artziniegako Garai Plazako Erlojuaren Dorrea. Udalak 1993an zaharberritu zuen eraikina, baina lan horiek ez zuten erloju erraldoien konponketa barnebildu. Eraikinaren fatxadak ikusgarritasuna lortu du 2024az geroztik. Izan ere, dorreko horman margotu zuen Txerra Ortega muralista madrildarrak Artziniegako I. Horma Irudien Lehiaketako diseinu irabazlea. Joseba Vivanco alkateak Aiaraldea Komunikabideari azaldu dionez, horma irudiak eta dorreak bisitari ugari erakarri dituzte udalerrira. Hori dela eta, asko ziren dorreko erlojuak behingoz martxan jartzea eskatzen zuten bizilagunak.
