Arabako Foru Aldundiak Euskararen Erabilera Sustatzeko Plan Estrategiko berria osatu du 2025-2029 epealdirako. Hurrengo lau urteetan euskararen esparruan Diputaziotik sustatuko dituzten politikak barnebildu dituzte dokumentu horretan, sei ardatz eta 34 ekintzatan.
Dokumentu hori aurkezteko, “Gasteizentrismoa” gainditu nahi izan dute Aldundiko kideek. Horretarako, Arabako lurralde guztietan egingo dituzte aurkezpenak. Hain zuzen, atzo egin zuten lehena Laudioko Lamuza parkeko Kasinoan, tokiko ordezkari politikoen, euskalgintzako ordezkarien zein euskara teknikarien aurrean.
Aldundiko hainbat ordezkarik hartu zuten parte bertan, Iñaki Guturbai tartean. Berdintasun, Euskara eta Gobernantzako foru diputatuak nabarmendu zuen Aiaraldea toki aproposa dela planean zehaztutako ekintzak garatzeko, eskualdeko euskara ezagutza maila Arabako beste zonalde batzuetakoa baino altuagoa delako, eta horrek dakarrelako oinarria egotea erabileran eragin ahal izateko. Horrez gain, Aldundiko ordezkariak nabarmendu zuen tokiko erakunde eta eragileekin elkarlana sustatu nahi dutela plan berriaren bidez, eta prest daudela horretarako baliabide ekonomikoak bideratzeko.
Plana aurkezteaz gain, Araba lehen alaba dokumentalaren trailerra aurkezteko ere baliatu zuten atzoko saioa, ikus-entzunezkoaren egileen parte hartzearekin. Aurreratu dutenez, formatu bereko beste aurkezpen bat egiteko asmoa dute Aiaraldean urtarrilean, Amurrion.