Aurtengo ikasturtean Faktoriako sormen egonaldietan parte hartu duten artistek Arte Eman Festan egin zuten bat, iragan azaroaren 22an. Kultur Faktoriak antolaturiko Arte Hartze Zikloaren azken emanaldia izan zen hori, eta artista bakoitzak garatutako proiektuetan murgiltzeko aukera eskaini zuten.
Orotara lau artistek edo kolektibok taularatu zituzten Faktoriako egonaldietan ondutako lanak. "Jaialdiari hasiera emateko, Libe Estebaranzen Mina Espazioa ezagutzeko aukera izan genuen Faktoriako kanpoaldetik paseo kolektibo-performance baten bidez. Ibilaldiaren amaieran Tar Tar kolektiboarekin egin genuen topo eta soinu esperimentalekin batera dantza pieza bat eskaini ziguten: Arran-Erran. Arratsaldearekin jarraituz, Oscar Pascualen Petra ikusi genuen, dantza klasikoa eta publikoarekin izandako elkarrizketak uztartzen zituen arte eszenikoetako pieza bat. Eta amaitzeko, Gontzal Royuelaren Ximurrak lanaren zati baten erakustaldiaz gozatu genuen, ikusleak hunkituta utzi zituena", azaldu dute Kultur Faktoriako kideek.
Lau piezen ondotik solasaldia eskaini zuten Arte Eman Festan elkartutako artistek, sormen prozesuaren nondik norakoetan gehiago sakontzeko asmoz. Paula Urquijo, Leire Sanjurjo eta Alberto Fernandez iazko Arte Hartze Zikloko bekadunek ikerketa lana osatu dute jaialdian bildutako informazioarekin. Urtarrilean aurkeztuko dituzte ateratako ondorio nagusiak, podcast formatuan.
Argazkiak: Kultur Faktoria