Hamabostekari bereziarekin agurtuko du urtea Aiaraldea Komunikabideak. Inprentatik atera berri da Aiaraldea Hemen hamabostekariaren azken zenbakia, eta inoiz baino orrialde gehiago izango ditu: 48 orotara.
Laudion sortutako Ondo Etorri harrera elkarteari begirada sakona eskaini diogu hamabostekariaren urteko azken zenbakian. Udaberrian sortu zuten harrera sarea, eta geroztik ibilbide oparoa egin du, helburu bikoitzarekin beti ere: kale egoeran bizi diren herritarrak artatu eta narratiba arrazistari aurre egitea.
Gabonetako gehigarria
Ate joka daude Gabonak. Hori dela eta, 16 orriko gehigarri berezia osatu dugu Aiaraldea Hemen hamabostekariarekin batera banatzeko. Gabonetako ospakizunen inguruko informazio zabala aurkituko du irakurleak bertan, bai eta eskualdeko ekoizle eta merkatarien produktuak kontsumitzeko gida ere.
Hauek eta beste hainbeste gai interesgarri aurkituko ditu irakurleak Aiaraldea Hemen hamabostekariko orrietan. Datozen egunetan banatuko da hamabostekaria eskualdeko saltoki, taberna, ikastetxe, kulturgune, liburutegi eta kaleetan, doan.