Foru Aldundiak eta URAk (Uraren Euskal Agentziak) lankidetza hitzarmen berria sinatu dute, 2016-2026 aldirako Arabako Lurralde Historikoko Hornidura eta Saneamenduko Plan Zuzentzailean jasotako sei jarduera finantzatzeko eta gauzatzeko. Horietako lau eskualdean bertan dira.
Akordioaren arabera, URAk 4 milioi euroko inbertsioa egiteko konpromisoa hartu du, eta Arabako Foru Aldundiak, berriz, eraikuntza-proiektuen garapena eta obren lizitazioa bere gain hartuko ditu, baita proiektu horiei ekiteko behar den gainerako gastua ere.
Aiaraldean egingo dituzten obrak honako hauek izango dira:
- Gorbeia-Askargan Garaiko hartuneen hornidura-hodia berritzea.
- Delika lotzea eta biltegi berri bat eraikitzea.
- Izoria Murgako poligonoarekin lotzeko kolektorea.
- Okondo Maroñoko hornidura-sistemarekin lotzea.
Saray Zarate Ekonomiaren Garapen eta Iraunkortasuneko foru diputatuak honakoa adierazi du azpiegitura horien inguruan: "Emari ekologikoak errespetatzen laguntzen dute, urak ubideetara itzuli aurretik behar bezala tratatuko direla ziurtatzen dute eta isurketen ondorio negatiboak minimizatzen dituzte".