Eusko Jaurlaritzako eta Araba eta Bizkaiko Foru Aldundietako ordezkariekin batzartu dira gaur Tubos Reunidoseko ordezkari sindikalak, eta Txerra Molinuevo Amurrioko alkateak ere parte hartu du bileran, Trapagarango bere homologoarekin batera. Multinazionalak 301 kaleratze egiteko asmoa iragarri zuenetik langileek eta erakunde publikoek egiten duten lehenengo bilera da honakoa.
Bilera gazi gozoa izan dela aitortu dute enpresa batzordeko kideak Lakuako bulegoen atarian: “Jaurlaritza eta Aldundia zorraren berregituraketarekin daude tematuta, ez da ezer geratu argi”.
Greba eguna eta elkarretaratzea Lakuan
Bileraren hitzorduarekin bat eginez greba eguna egin dute gaur Tubos Reunidoseko beharginek Amurrioko lantegian; otsailaren 9az geroztik egiten duten bigarren lanuztea. Bart gauetik ari dira piketeak fabrikako sarreran elkartzen, eta grebaren jarraipena erabatekoa izan da gaur ere.
Goizeko bostetako piketearen ostean, autobusetan zein auto partikularretan abiatu dira grebalariak Gasteizera. Elkarretaratzea zuten deituta Eusko Jaurlaritzako Lakuako bulegoen aurrean, erakunde publikoen eta ordezkari sindikalen arteko bilerak iraun bitartean.
Mobilizazioa hasi baino hogei minutu lehenago jendetza zegoen elkartuta Eusko Jaurlaritzaren egoitzaren aurrean. Ertzaintzak dispositibo zabala egin du bertan, sarrera nagusia hesituz. Ehunka lagun batu dira bi ordu baino gehiagoz luzatu den protestan. Konpainia tubularreko langileak ez ezik, beste hainbat enpresetako langileak ere elkartu dira, tartean greba mugagabean 147 egun bete dituzten Maderas de Llodioko beharginak.
Komunikabideen arreta nabaria ere erakarri du bilerak zein protestak, eta dozenaka izan dira Lakuako atean ordezkari sindikalen irteeraren zain egon diren kazetariak.
Zorraren berregituraketa eta enpresaren bideragarritasuna
Bilerak emandakoen inguruan galdetuta, zehaztasun gutxi egon direla aitortu dute sindikatuen ordezkariek. Eusko Jaurlaritza eta Aldundia zorra berregituratzearen beharraz mintzatu dira nagusiki, Oier Bidaurrazaga LABeko ordezkariak Aiaraldea Komunikabideari azaldu dionez: “Bueltaka eta bueltaka aritu dira horren inguruan”.
Langileen ordezkariek, ordea, fabrikaren bideragarritasunaren bermeetan jarri nahi izan dute fokoa bileran, eta bideragarritasuna multinazionalak aurkeztutako Enplegua Erregulatzeko Espedientearen aplikaziotik igarotzen den galdegin diete erakunde publikoei.
Izan ere, sindikatuek zail ikusten dute Amurrioko fabrikaren etorkizuna zuzendaritzak altzairutegia ixteko duen asmoa egikaritzen bada: “Altzairutegiak ematen dio bideragarritasuna lantegiari, horrek ematen dion malgutasunagatik”. Erakunde publikoek onartu dute azpiegitura horren faltak zailtasunak ekarriko dizkiola fabrikari.
Jose Antonio Jainaga Sidenorreko presidenteak “Euskadiko altzairutegi handia” sortzeko zituen asmoen inguruan ere modu zuzenean galdetu diote sindikatuek Eusko Jaurlaritzari, eszenatoki horretan Tubos Reunidos zegoen ala ez jakin nahian.
Gobernuko kideen arteko desadostasunak
Eusko Jarularitzako bazkide diren EAJ eta PSE-EEren arteko tirabirak agerian geratu dira gaurko bilkuran, bertan parte hartu duten ordezkari sindikalek Aiaraldea Komunikabideari azaldu diotenez.
Aste honetan Tubos Reunidoseko aferak desadostasuna sortu du Ramiro Gonzalez Arabako Foru Diputatuaren eta Javier Hurtado Arabako sozialisten buruaren eta Jaurlaritzako Turismo Sailburuaren artean. Gaurko bilkuran ere, jeltzaleek zuzendutako Industria Sailaren eta PSE-EEk gidatutako Enplegu Sailaren arteko desadostasun nabariak egon direla azaldu dute sindikatuek.
Ertzaintza piketean
Bilera bukatu aurretik, azken eskaria luzatu diete langileek Eusko Jaurlaritzari: Ertzaintzak Tubos Reunidoseko mobilizazioetan duen presentzia eta jarrera kontrolatzea. “Ez gara gaizkileak”, salatu dute.