Araba Euskaraz jaia Amurrion ospatuko dute aurten, baina euskara sustatzeko ekimenari lotutako ekintzak hasi dira jadanik. Horietako bat ostiralean izango da eta munduko zesta-punta jokalari onenetakoak eramango ditu Gasteizera. Sarrerak salgai daude dagoeneko, hemen.
Horrela, Araba Euskaraz Masters Series txapelketari esker, Ameriketako Estatu Batuetan denboraldia hasi duten hainbat pilotarik bisitatuko dute hiriburua. Zehazki, kirolariek bi finalerdi izango dituzte martxoaren 6an eta 13an eta finala hilaren 20an.
Emakumezkoen eta gizonezkoen kategoriak egongo dira eta ordezkari arabarrak ez dira faltako. Julen Del Rio Eusko Label Winter Series txapelketa entzutetsua jokatu duen atzelari gasteiztarra da. Duela bi urte txapela jantzi zuen Olaben, Erkiagarekin bikotea osatuta. Iaz aldiz, azpitxapeldun geratu ziren.
Maite Ortiz de Mendibil Antxetako pilotaria da eta 2022ko Munduko Txapelduna. Iaz Araba Euskaraz Master Seriesa irabazi zuen Arai Lejardirekin eta aurten Frida Watkins izango du lagun. Gasteizko txapelketarekin batera, gainera, emakumeen Euskotren Winter Seriesa lehiatzen arituko da, Durangon.
Hirugarren arabarra Aaron Gonzalez de Matauko da. Duela bi edizio ere jokatu zuen eta Danian (Florida, Ameriketako Estatu Batuak) hiru hilabeteko denboraldia egitetik dator, beste 20ren bat gazterekin batera. Aaronek Thibault Basque lapurtarra izango du atzean lagun, Winter Serieseko azken txapelduna.
Gainerako parte hartzaileak honako hauek izango dira emakumezkoetan: Lur Lejardi, Oaia Otaño, Helena Barrenetxea, Maialen Aldazabal, Oihana Sorozabal, Romane Mercadier eta Frida Watkins. Gizonezkoetan, aldiz, Aritz Erkiaga, Jon Zabala, Johan Sorozabal, Imanol Lopez eta Eñaut Urreisti arituko dira.
Partida guztiak Olabe pilotalekuan izango dira eta lehen kanporaketa martxoaren 6an, ostiralean, jokatuko dute, 18:30ean. Lur-Oaia lehiatuko dira Helena-Maialen bikotearekin eta gizonezkoen kategorian Erkiaga-Zabala eta Aaron-Basque arituko dira nor baino nor. Sarrerak hemen zozkatuko ditugu.
Martxoaren 13an leku eta ordu berean finalerako azken txartelak erabakiko dituzte Sorozabal-Romane eta Maite-Frida bikoteek eta Johan-Lopez eta Urresti-Del Rio, emakumezkoen eta gizonezkoen diziplinetan, hurrenez hurren. Zozketa hemen topatu daiteke.
Finala martxoaren 20an jokatuko dute Olaben 18:30ean. Zozketako sarrerak eskuratuta ikus daiteke, baina ETBk ere emitituko du.