Oihu bat Palestinara musika jaialdia izango da larunbat honetan, martxoaren 21ean, Durangoko Landako gunean. Aiaraldea Komunikabideak bertara joateko sarrera bikoitza zozkatuko du ostiralean bertan. Hemen parte har daiteke zozketan.
Palestinarekin Elkartasuna plataformak eta Euskal Herriko hainbat musikarik elkarlanean sortutako kultur ekimena da Oihu bat Palestinara, herrialdeak "bizi duen errealitate gordina berriz ere lehen lerrora ekartzeko asmoz" antolatua. Euskal Herriko talde ugari batu dira elkartasun festibalera, hala nola Anari, Belako, Bengo, Ibil Bedi, J Martina, Merina Gris, Hofe, Kiliki, beste hainbaten artean.
Maialen Lujanbio, Amets Arzallus, Nerea Ibarzabal eta Txaber Altube bertsotan arituko dira. Barretarako tartea ere ez da faltako, Asier K eta Antton Telleriaren eskutik.
Antolatzaileek adierazi dutenez, jaialditik lortutako irabaziak Palestinaren aldeko mobilizazioetan parte hartzeagatik "jasandako errepresio ekonomiko zein judiziala arintzera bideratuko dira, sionismoaren eta bere konplizeen aurkako borrokan tinko jarraitu ahal izateko".
Sarrerak jaialdiaren webgunean daude salgai. Aiaraldea Komunikabideak ostiralean zozkatuko du tiket bikoitz bat.