Euskal kulturaren adierazpen garaikideek Bilbo hartu dute martxoan zehar, Loraldia kultur jaialdiaren eskutik. Larunbatean esango dio agur hiriburuari hamabigarren edizioak, baina aurretik Aiaraldeko artisten lanaz gozatzeko aukera egongo da bihar, hilaren 25ean. Iaiaiai irrintzi taldeko kideak zein Piszifaktoriako lagunak Azkuna Zentroan eskainiko dituzte emanaldiak, 19:00etatik aurrera. Biak ala biak doakoak izango dira, baina sarrerak eskuratu behar dira.
Irrintziaren begirada berri bat
20 minutuko performancearekin irekiko du Iaiaiai irrintzi taldeak iluntzea. Soinua, gorputza eta espazioa uztartzen dituen pieza bat onduko dute Alondegiko atrioan, "Irrintziaren begirada berri bat" eskaintzeko asmoz. Zer da irrintzia XXI. mendean? Komunikazio tresna? Eraldaltzen ari den euskal kulturako identitatearen sinboloa? Arbasoekin konektatzen gaituen oihua? Galdera horien eta gehiagoren inguruan sortutako emanaldia izango da.
Hegan egiteko gogoa da
Irrintziekin amaitu eta hamar minutuko atsedenaldiaren ostean, Azkuna Zentroko atondoan murgiltze-esperientzia bat proposatuko du Piszifaktoria ideien laborategiak. Mikel Ayllonek, Igor Arzuagak eta Irati Agirreazkuenagak osatutako kolektiboaren azken lana da Hegan egiteko gogoa da eta "buruko gaitzek eragiten duten ezinegona" kontatu nahi dute ikuskizunaren bidez.
Berezitasun nabaria izango du obrak, begiak estali beharko baititu publikoak: "Begirik gabe, entzumenaren, ukimenaren, dastamenaren eta usaimenaren bidez egindako bidaia bat izango da. [...] Parte hartzaileek haien zentzumenak piztuko dituzten hainbat egoera biziko dituzte, buru-osasunari buruzko istorio honen eszena desberdinetan. Soinu murgiltze-espazio batean, belarriez gain, azalak, mihiak edo sudurrak ere piztuko dizkieten hainbat dispositiborekin topo egingo dute (haizagailuak, berogailuak, lurruneztagailuak, lurringailuak…"
Ordu erdiko bi pase egingo ditu Piszifaktoriak, 19:30ean eta 20:30ean.