Astebete barru, apirilaren 8an, Itzulia Basque Country nazioarteko txirrindularitza-lasterketa profesionalaren aurtengo edizioaren hirugarren etapa izango da. Basaurin abiatu eta bukatuko da eta bere ibilbideak Aiaraldeko hainbat herri zeharkatuko ditu.
Amurrioko Udalak gaur bertan jakinarazi du tropela igarotzeak eta horri lotutako segurtasun-dispositiboak hainbat gorabehera eragingo dituztela ibilgailuen zirkulazioan, 14:15etik 15:15era bitartean batez ere.
Etenak eta zirkulazio-etenak izango dira. Lasterketak 14:15ean zeharkatuko du Amurrioko hirigunea. Probaren ibilbidea Federico Barrenengoa eta Felix Murga kaleen arteko bidegurutzean dagoen biribilgunetik sartuko da udalerrira, eta Felix Murgatik, Epaitegiko biribilgunetik, Araba kaletik, elizako biribilgunetik eta Bañuetaibar kaletik jarraituko du. Ondoren, A-625 errepidetik irtengo da Saratxorantz.
Udalak eskatu die herritarrei informazio hori aintzat hartzeko bidaiak antolatzeko orduan.
Eskualde osoan
Modu batean edo bestean, Aiaraldea osoa zeharkatuko du etapak. 13:40ean jarriko dira martxan txirrindulariak eta eskualdean honako ibilbidea izango dute:
- Arrankudiaga-Zollo
- Arakaldo
- Areta
- Laudio
- Okondo
Handik Sodupera joko du lasterketak eta gero Artziniegatik itzuliko da:
- Santa Koloma
- Artziniega
- Aiara (Llanteno, Menagarai, Ibaguen, Arespalditza, Murga)
- Amurrio
- Urduña
Altubera joan eta gero, kirolariak berriro sartuko dira Aiaraldean:
- Baranbio
- Orozko
Aipatu beharra dago azken urteetan behin baino gehiagotan igaro dela lasterketa eskualdetik eta Laudion, Amurrion eta Urduñan izan dituela irteerak, herritar mordoa bilduta.